Microsoft şirkətinin alt şirkətlərindən biri olan GitHub yeni Hey GitHub funksiyasını təqdim edib. Belə ki, bu funskiya keçən il təqdim olunmuş süni intellekt əsaslı kodlaşdırma platforması olan Github Copilot istifadəçiləri üçün səsli köməkçi funksiyasını yerinə yetirəcək. İstifadəçilər bu funksiya vasitəsi ilə klavituraya ehtiyac duymadan kodlaşdırma edə biləcəklər. Hətta şirkət yeni funksiyanı artıq sınaqdan keçirməyə başlayıb.
Əsasən proqram tərtibatçıları və dizaynerlər üçün nəzərdə tutulmuş süni intellekt əsaslı GitHub Copilot platforması yeni funksiya ilə birlikdə artıq daha asan istifadə olunacaq. Visual Studio Code, Neovim və JetBrains IDE kimi inteqrasiya olunmuş inkişaf mühitində işləyə bilən GitHub Copilot proqram təminatı süni intellekt vasitəsilə istifadəçilərin məqsədlərinə uyğun olaraq ən müvafiq kodları təklif edəcək. Keçən il təqdim olunmuş platformanı şirkət əvvəl pulsuz təklif etsə də, sonralar aylıq 10$ qarşılığında istifadəçilərə abunəlik kimi satıldı.
Yeni funksiya olan Hey GitHub səsli köməkçisi hələlik yalnız Visual Studio ilə kodlaşdırmalar edərkən istifadə oluna bilir. İstifadəçilər bu funksiyanı əsasən müxtəlif sətirlərə keçid etmək və ya kodlaşdırma metodunu dəyişdirmək üçün istifadə edə bilər. Süni intellekt əsasında işləyən bu platformanın gələcəkdə daha təkmilləşdirilimiş funksiyalar ilə təmin olunacağı güman edilir. Xatırladaq ki, ötən günlərdə Google özü-özünü kodlaşdıra bilən yeni robot təqdim etmişdi. Bu gün isə GitHub şirkətinin yeni funksiyasını təqdim etməsi gələcəkdə kodlaşdırmaların daha çox təkmilləşəcəyini düşünməyimizə imkan verir.
