“Strategy Analytics” agentliyi, smartfon əməliyyat sistemlərinin yayılmasına aid yeni hesabat paylaşıb. Eyni zamanda smartfon əməliyyat sistemi bazarının 2027-ci ilə qədər inkişaf proqnozu açıqlanıb. Göstərilən bazar payı infoqrafikasında iOS və Android əməliyyat sistemlərindən əlavə olaraq, Huawei şirkəti tərəfindən hazırlanmış Harmony OS da yer almışdır.
2012-ci ildən Android əməliyyat sistemi smartfon bazarında böyük fərqlə liderlik edirdi. 2017-ci ilə qədər isə iOS ilə digər əməliyyat sistemlərini smartfon bazarından praktiki olaraq çıxarmışdılar. 2022-ci ilin göstəricilərinə görə, Android bazarın 81%-ni, Apple şirkəti isə iOS ilə 18%-ni tutub. Bu nəhənglərin arasında isə Harmony OS 2% bazar payı əldə edə bilmişdir. Huawei şirkətinin yeni əməliyyat sisteminin, Çin bazarından kənarda praktiki olaraq istifadə olunmadığını nəzərə alsaq, göstərici kifayət qədər yaxşı qarşılanır. Çünki, bu vaxta qədər iOS və Android əməliyyat sistemlərindən başqa bir əməliyyat sistemi bazar payında görünən deyildi.
Analitiklərin hesablamalarına görə, 2027-ci ilə qədər iOS istifadəçilərinin sayı bir qədər də azalacaq (17%-ə qədər). Bu gözləntilərə, Apple smartfonları üçün komponentlərin istehsalı və təchizatı ilə bağlı mövcud problemlər səbəb olur. Harmony OS ilə bağlı növbəti ilə aid proqnozlara isə analitiklər şübhə ilə yanaşırlar.
Mənfi proqnozlara baxmayaraq, Huawei şirkəti bu il keçirilən HDC 2022 konfransında satışların artması ilə bağlı açıqlama vermişdi. Verilən məlumatlara əsasən, bu ilin dekabr ayında, Harmony OS ilə işləyən aktivləşdirilmiş cihazların sayı 320 milyon ədədə çatıb. Lakin bu rəqəm 2%-lik bazar payı belə olsa istifadəçi kütləsi olaraq şirkətə qlobal səviyyədə yarar gətirmədiyindən Huawei mobil cihazlar sektoruna maraqlı deyil. Smartfon bazarında inkişaf sürətinin aşağı olması ilə bağlı Huawei şirkəti Harmony OS əməliyyat sistemi ilə elektromobil sektoruna fokuslanaraq bazar payı cəhətdən o istiqamətdə güclənmək istəyir. Bununla bağlı ilk addımlar da, çox güman ki Çin bazarında atılacaq.
