Smartfonu istifadə etmək istədikdə əllərinizin məşğul olması bəzən sizə problemlər yarada bilər. Bu zaman köməyinizə səsli köməkçiləriniz çatacaqdır. Hal-hazırda müxtəlif tanınmış brendlər özlərinin səsli köməkçilərini, assistentlərini istifadəçilərə təqdim ediblər. Ən çox tanınmış bu tip assistentlərə Apple şirkətinə aid Siri, Google şirkətinə aid Google assistent, Amazan şirkətinə aid Alexa nümunə göstərilə bilər. Android smartfonlar arasında ən məşhuru isə məhz Google assistent tətbiqidir. Google Şirkəti, Google səsli köməkçiniz üçün maraqlı bir yenilik gətirəcək. Belə ki, verilən məlumata görə assistentiniz səsinizi tanıya biləcək.
Google assistent bunu necə bacaracaq?
Xüsusiləşdirilmiş nitq tanınması olaraq adlandıra biləcəyimiz yen xüsusiyyətin əsas iş prinsipini bir çoxlarınızın bəyənməyəcəyini düşünürük. Çünki, Google assistent səsinizi tanımaq üçün danışarkən səsi qeydə alaraq smartfonun yaddaşında saxlaya bilər. Tətbiq burada səsinizi tanımaqdan daha çox, sanki təkrarladığınız sözləri, tez-tez işlətdiyiniz ifadələri və.s yaddaşda saxlayaraq eyni sözü fərqli biri dediyi zaman müxtəlifliyi ayırd edə biləcək şəkildə sazlanılıb.
Qeyd edək ki, Google tətbiqinin yeni versiyasının ortaya çıxmasından sonra qaynaq kodlarının analiz edilməsi nəticəsində bu fikirləri gücləndirən yeni bir kod sətri tapılıb. Həmin sətri tərcümə etdikdə, əvvəlki abzasda yazdığımız cümlələr ortaya çıxır:
Google Assistent dediklərinizi daha yaxşı anlasın deyə səs yazılarını cihazda saxlayın. Səs yazıları cihazda qalır və xüsusiləşdirilmiş nitq tanınmasının söndürülməsi ilə istənilən zaman bu səs yazıları silinir. Daha ətraflı . . .
Qaynaq kodlarından aşkarlanmış cümlədəki bu sətrin “Daha ətraflı” yazılan hissəsində böyük bir ehtimalla hər hansısa bir səhifəyə keçid qoyulacaq. XDA-Developers üzərindən 9to5Google resursuna istinadən verilmiş məlumata görə həmin keçid əslində əvvəlcədən Google şirkətinin rəsmi saytında mövcud olmuş ola bilər. Google dəstək səhifəsində, Google Assistent yaxşılaşdırılarkən səs və səs datalarınızın gizli saxlanılacağına dair bənd qeyd olunur. Böyük bir ehtimalla sətrin sonundakı daha ətraflı hissəsi elə həqiqətən həmin sayta yönləndirmə edəcək. Yeniliyin nə vaxt istifadəyə veriləcəyi hələlik məlum deyil. Bəlkə də bir neçə ay gözləmək məcburiyyətində qala bilərik. Google şirkətinin səsli köməkçisi onsuzda Azərbaycan dilində işləmədiyindən bizim üçün bunun o qədər də əhəmiyyətli tərəfi olmayacaq. Lakin digər dillərdə Google Assistenti mütəmadi də olsa işlədirsinizsə yeniliyi bəyənə bilərsiniz.
