Dünyanın texnologiya nəhəngi olan Apple tərəfindən bu yaxınlarda buraxılması gözlənilən iOS 16.2 ilə birlikdə Xüsusi Əlçatanlılıq rejimi funksiyasını istifadəyə verəcək. Belə ki, bu rejim iPhone və iPad-dən istifadə etmək üçün fərdiləşdirilə bilən və sadələşdirilmiş üsul təklif edir. Tərtibatçılar üçün yayımlanan iOS 16.2 beta 2 versiyası sayəsində Apple-ın daha sadə, daha səmərəli istifadəçi interfeysi təklif edən xüsusi rejim üzərində işlədiyi müəyyən olub. Bu rejim vasitəsilə artıq smartfondan başı yaxşı çıxmayan yeni istifadəçi belə smartfondan rahatlıqla istifadə edə biləcək.
Xüsusi Əlçatanlılıq rejimi hansı yeniliklərə malikdir?
Apple-ın iOS 16.2 ilə birlikdə istifadəyə verməsi gözlənilən Xüsusi Əlçatanlılıq rejimi bizə məlum olan iPhone və iPad interfeysini sadələşdirəcək. Belə ki, yeni əlçatanlılıq rejiminin interfeysində mesaj, kontakt, kamera və musiqi bölmələri böyük formada yer alacaq. Bu proqramların hər biri normal ölçüsündən 2 və ya 3 qat daha böyük görünəcək. Həmçinin bu proqramlardan istifadə edərkən smartfonun aşağı hissəsində geriyə düyməsi yer alacaq. Görünən odur ki, şirkətin belə bir funksiya yaratmaqda məqsədi texnologiyadan və ya Apple cihazlarından xəbərsiz olan istifadəçilərin rahatlıqla smartfondan istifadə edə bilməsini təmin etməkdir.
Smartfonu normal interfeysə geri qaytarmaq lazım olduqda istifadəçi paroldan istifadə edə bilər. Əgər parol yoxdursa o zaman ev düyməsinə və ya yan düyməyə 3 dəfə basmaqla bu rejim sönəcək, smartfon normal interfeysə qayıdacaq. Apple-ın bu xüsusiyyəti iOS 16.2 ilə və ya gələcəkdəki iOS versiyaları ilə təqdim edib-etməyəcəyi hələlik məlum deyil. Xüsusi Əlçatanlılıq rejimi funksiyası sınaq prosesində uğursuz olarsa iOS 16.2 ilə birlikdə istifadəyə verilməyəcək.
