Məşhur texnoloji bloq yazarı Mishaal Rahman Android smartfonlarının “system” fayllarının nəhəng həcminin sirrini açıb. Məlum olub ki, problem əməliyyat sisteminin acgözlüyündə deyil. 2 başlıca problem var. Onlardan biri insanların smartfonlarını sıfırladıqdan sonra əməliyyat sisteminin proqram təminatı yanlış hesablamasıdır. Digər problem isə daha da qəribədir.
Mənbəyə görə, sistem qovluğunun ölçüsünü təyin edərkən, əməliyyat sistemi fotoşəkillər, videolar və ya sənədlər kimi digər fayllar kimi təsnif edə bilmədiyi bütün faylları sistem fayllarına qatır. Başqa sözlə, düzgün qovluqlarda olmayan və Android tərəfindən tanınmayan bütün fayl növləri ümumi “system” həcminə əlavə edilir. Beləliklə, sizə aid fayllar da sistem fayllarının bir hissəsi şəklində parametrlərdə qarşınıza çıxır.
Problemi vizuallaşdırmaq üçün Mishaal Rahman təsadüfi məlumatlarla doldurulmuş 3GB fayl yaradıb. Daha sonra onu /data/media/0 qovluğuna yerləşdirib. Əməliyyat sistemi bunu təsnif edə bilməyib və Sistem qovluğunu müvafiq ölçü ilə artırıb. Başqa bir nümunəvi nümunə oyunlarla bağlı məlumatlardır. Belə ki, çox sayda oyuna sahibsinizsə həmin oyunların müxtəlif uzantılarda olan dataları çox vaxt təsnif edilmədiyindən birbaşa sistem faylları kimi hesablanmağa başlanır.
Yazara görə, bu gün yalnız Samsung One UI proqram təminatı həqiqi sistem faylının ölçüsünü doğru bir şəkildə hesablayır. Lakin bu yalnız altıncı versiya üçün keçərlidir. Proqram təminatının əvvəlki versiyaları da Android əməliyyat sisteminin sistem fayllarını tanımaq ilə əlaqədar bir problemdən əziyyət çəkir.
Nəticə etibarilə sistem fayllarının həcmi bölməsi hələlik, çox böyük bir xətadan ibarətdir. İstifadəçilərə tövsiyə edilir ki, sistem həcminin nə qədər olduğuna çox da fikir verməsinlər. Çünki, orada göstərilən rəqəm təkcə sistemin yox, sizin də yüklədiyiniz, çəkdiyiniz, istifadə etdiyiniz tətbiq və fayllara aid ola bilər. Problemin Google tərəfindən nə vaxt həll ediləcəyi isə naməlumdur.
