Dünyanın texnologiya nəhənglərindən biri olan Google rəsmi olaraq ilk qatlanan Pixel Fold modelini elan edib. Bununla bağlı şirkət rəsmi səhifəsində yeni modelinin tizer videosunu yayımlayıb. Qeyd edək ki, texnologiya nəhəngi yeni cihazını yaxın günlərdə baş tutacaq I/O 2023 tədbirində təqdim etməyi planlaşdırır. Bundan əlavə Google nəhəng tədbirdə Google Pixel 7A, Pixel Tablet modellərini də təqdim edəcək. Ümumiyyətlə bu ilki tədbirdə Google şirkəti öz modelləri ilə fərqlənəcək. Yeni Pixel Fold modeli barədə uzun müddətdir ki, iddialar irəli sürülür. Hətta bəzi mənbələr yeni modelin sızdırılmış görüntülərini də paylaşmışdı. Bu barədə daha ətraflı məlumat almaq üçün saytımızdakı xəbərə keçid edə bilərsiz.
Bir çox texnologiya şirkəti ilə rəqabət aparan Google onlardan geri qalmamaq üçün ilk qatlanabilən Pixel Fold smartfonunu hazırlayır. Son dövrlərdə bir çox şirkət qatlana bilən modelləri ilə texnologiya sahəsində böyük səs doğurmuşdu. Google şirkəti də onlardan geri qalmaq niyyətində deyil. Şaquli formada qatlanan cihazın arxa tərəfində də kiçik bir ekran paneli mövcud olacaq. Onu da qeyd edək ki, yeni smartfonun arxa kameraları Pixel smartfonlarının kamerasına çox oxşayır.
Başlanğıc qiyməti 1799$ olacaq smartfon Google Tensor G2 prosessoru ilə təchiz ediləcək. 5.8 düymlük xarici ekran və 7.6 düymlük daxili ekran panelinə sahib olan smartfon möhtəşəm batareya ömrünə sahib ola bilər. Belə ki, smartfonun normal rejimdə 24 saat, qənaətcil rejimdə isə 72 saata qədər enerji saxlayacağı iddia olunur. Onu da qeyd edək ki, 283 qram ağırlığı olan smartfon iyunun 27-də ABŞ-da satışa çıxarılacaq.
