Azərbaycanlı tələbələrin 4YOU startapı “CAREC Universiteti Startup Generator 2023” proqramının qalibi olub. Qted edək ki, CAREC sekretariatı tərəfindən təşkil olunan proqram Mərkəzi Asiya Regional İqtisadi bölgəsindəki universitet tələbələri arasında həyata keçirilir. Bu il tədbirdə ölkəmizi təmsil edən 4YOU startapına xüsusi mükafatlar təqdim edilib. Ümumi olaraq yarışda 10 ölkədən 168 komanda, 580 tələbə iştirak etmişdir. Onların arasında isə sadəcə 10 komanda öz startap ideyalarına görə qalib elan edilmişdi. Bunlardan biri də məhz 4YOU komandasıdır. Yarışda iştirak edən UNEC Startup Incubatorun 4YOU komandasına Vüqar Əliyev, Nadir Hüseynov, Fidan Muradova, İdris Cəfərov, Gülxanım Əkbərova və Arzu Qarayeva daxildir.
4YOU startapı üçün əsas ideya, uşaqların fiziki və psixi sağlamlığının möhkəmləndirilməsidir. Hətta startap tədbirin yekununda “Uşaqlar üçün psixologiya və fitness tətbiqi”-nə görə xüsusi mükafata layiq görülüb. Söhbət 4youkid platformasından gedir. Bu platformada uşaqlar ilə psixoloqlar fərdi şəkildə ünsiyyət qurur və görüş keçirirlər. Birdən çox seans nəticəsində isə uşaqların psixoloji sağlamlığı bərpa edilir. Hətta psixoloqlar ilə görüş keçirən hər bir uşaq üçün fərdi oyuncaqlar dizayn edilir. “Daha yaxşı gələcək üçün” sloqanı ilə 4YOU komandası psixologiyanı bütün uşaqlara əlçatımlı etməyi qarşısına məqsəd olaraq qoyub.
8 həftə davam edən innovasiya müsabiqəsində qalib olan digər komandalara isə NIP, GSL, Goddard Discovery kimi komandalar aiddir. Qeyd edək ki, hələlik sadəcə Asiya regionunda olan tələbələr üçün nəzərdə tutulan müsabiqə gələcəkdə fərqli regionlara da yayıla bilər. Hələlik isə sadəcə Azərbaycan, Çin, Gürcüstan, Qazaxıstan, Qırğızıstan, Pakistan, Monqolustan, Tacikistan, Türkmənistan, Özbəkistan kimi ölkələrin tələbələri müsabiqədə iştirak edə bilər. CAREC tədbirində bildirilib ki, 4YOU startapı gələcəkdə daha böyük nailiyyətlərə imza atacaq.
Startap ekosistemi xəbərlərini "İnnovasiya və Rəqəmsal İnkişaf Agentliyi" ilə tərəfdaşlıq çərçivəsində oxuyursunuz.
