Mobil çipset bazarında lider istehsalçı olan TSMC, gələcək 3nm və 2nm istehsal prosesi texnologiyası barədə məlumat verib. Apple, Mediatek, Qualcomm kimi nəhənglərə çipset istehsal edən şirkət 3nm və 2nm çiplərin performansı barədə qrafikləri bölüşüb. 3nm texnoloji proses bu ilin ikinci yarısından istifadəyə verilməlidir. Lakin 2nm istehsal prosesinə keçid gözlədiyinizdən daha gec baş tutacaq. Bu ildən başlayaraq çıxarılacaq 3nm istehsal prosesi, 2023-cü ildə N3E (Enhanced) modifikasiyasını, 2024-cü ildə N3P (Performance Enhanced) modifikasiyası ilə davam etdiriləcək. 2025-ci ildə 2nm texnoloji prosesə keçidlə birgə N3X (Ultra High Performance) adlandırılmış modifikasiyanı da görə biləcəyik. Əslində bu modifikasiyaları nəsil kimi düşünmək mümkündür. Məsələn, bu il N4P (Performance Enhanced) ikinci nəsil 4nm istehsal prosesi 3nm texnoloji proseslə birgə TSMC tərəfindən təklif ediləcək. Hətta iddialara görə Qualcomm və Apple flaqman çipsetlərində bu il 3nm yerinə ikinci nəsil 4nm istehsal prosesindən yararlanacaq.
2nm və 3nm istehsal prosesləri performans və enerji sərfiyyatını yaxşılaşdıracaq
Yeni nəsil texnoloji prosesə sahib çiplərin enerji sərfiyyatı və performansı da xeyli inkişaf etdiriləcək. Xüsusilə 2nm istehsal prosesinə keçid çipsetin eyni enerjini istifadə edərək verdiyi performasnı 10-15% artıracaq, üstəlik eyni tezlikdə 25-30% daha az enerji sərf etməsinə imkan yaradacaq. Qeyd edək ki, burda müqayisə N2 və N3E (Enhanced)olaraq adlandırılmış texnoloji proseslər arasında aparılır. 2nm istehsal prosesinə keçid isə çipset üzərində eyni həcmə daha çox tranzistorun, daha sıx formada yerləşdirilməsi imkan verir. Yenə N2 və N3E modifikasiyasını qarşılaşdırsaq tranzistor sıxlığının 1,1 qat artdığını görərik. Çipsetlərin enerji sərfiyyatının öyrənilməsi üçün ən əhəmiyyətli şey terminlərdən biri də vatt başına düşən performansdır ki, yeni texnoloji proseslərə keçid bu dəyərlərə də təsirini göstərəcək. TSMC, vatt/performans nəzərən çipsetlərin 1 vatt enerji sərf edərək göstərə bildiyi maksimum performansı yüksəldəcək.
Samsung istehsalı 3nm texnoloji proses də bu ilin sonu təqdim ediləcək və Exynos 2300 şərti adlı çipsetin istehsal prosesinin əsasını formalaşdıracaq. Buna baxmayaraq insayderlərin fikrincə TSMC-nin 4nm texnoloji prosesi Samsung istehsalı 3nm texnoloji prosesdən daha effektiv nəticə göstərə bilər.
