Finlandiyada yerləşən Polar Night Energy startapı cənubdakı Pornainen şəhərində dünyanın ən böyük “qum batareyası”nı istifadəyə verib. 1 meqavat (MVt) istilik enerjisi istehsal gücü və 100 meqavat-saat (MWh) istilik saxlama gücü ilə sistem həm davamlı enerji istifadəsində, həm də karbon emissiyalarının azaldılmasında innovativ texnologiyası ilə seçilir.
Polar Night Energy-nin ilk kommersiya qum batareyası 2022-ci ildə istifadəyə verilib. Pornainen-də yeni sistem ilk versiyadan düz 10 dəfə böyükdür. Təxminən 13 metr hündürlükdə və 15 metr diametrdə olan nəhəng struktur 2000 ton əzilmiş sabun daşı ilə istilik saxlayır. Sabun daşı, yeri gəlmişkən, Finlandiya kamin istehsalçısı Tulikivi-nin istehsal tullantılarından əldə edilmişdir. Yeni sistem mərkəzi istilik müəssisəsinin istilik şəbəkəsinə inteqrasiya olunacaq və eyni zamanda şəbəkənin əsas istehsalat obyekti olacaq. Yayda təxminən bir ay, qışda isə bir həftə 5 min əhalisi olan Pornainen bələdiyyəsinin istilik ehtiyacını ödəyə bilən bu sistem yerli enerji istehsalında da köklü dəyişikliklərə yol açır.
Loviisan Lämpö mərkəzi istilik şirkəti tərəfindən istifadəyə verilən sistem ildə təxminən 160 ton karbon emissiyasının qarşısını alacaq. Beləliklə, mərkəzi istilik şəbəkəsində iqlimə uyğun transformasiya tullantıların 70 faizə qədər azaldılması ilə həyata keçiriləcək. Qum batareyasının işə salınması ilə mədən yanacağı Pornainendəki istilik sistemindən tamamilə silinəcək. Bununla yanaşı, yanacaq kimi istifadə olunan odun sərfi 60 faiz azalacaq. Polar Night Energy-nin Əməliyyat Direktoru Liisa Naskali, bu layihə ilə qum batareyası texnologiyasının daha böyük güclərə və müxtəlif sənaye sektorlarına transferi üçün möhkəm zəmin yaratdıqlarını bildirdi. Şirkət həmçinin yeni layihələr üçün həm Finlandiyada, həm də beynəlxalq miqyasda biznes tərəfdaşları ilə fəal danışıqlar apardığını açıqlayıb.
