Prosessorların performansına təsir edən bir çox nüans mövcuddur. Lakin istifadəçilərin hansısa bir prosessordan ala biləcəyi zirvə performansı adətən, onun tezliyi müəyyənləşdirir. Intel prosessorları arasında ən yüksək tezlik rəsmi olaraq 2011-ci ildə Intel Celeron D 352 modelində qeydə alınıb. Belə ki, bu prosessorun tezliyi 8543.7 MHz, yəni 8.5 GHz olmaqla ən yüksək nəticəni göstərib. Həmin nəticədən 10 il keçməsinə baxmayaraq bu vaxta qədər çıxarılmış heç bir prosessor bu tezliklərə qədər yüksəlməyə uyğun olmayıb. Ötən gün isə maraqlı bir hal yaşanıb. Hələ rəsmi olaraq açıqlanmayan Intel Core i9-13900K prosessorunu əldə etmiş anonim şəxs prosessor üzərində etdiyi rekord sınaqdan ekran görüntüsü paylaşıb. Görüntüyə görə Intel prosessoru 10 ildən sonra ilk dəfə sabit 8GHz tezlikdə işləyir.
Intel Core i9-13900K təməl vəziyyətində 8GHz verdiyindən tezlik lap çox artacaq
Intel Core i9-13900K prosessoru hələ çıxmasa da barəsində detallar əlimizdə mövcuddur. Bu model 8 P və 16 E nüvəsindən ibarət ümumulikdə 24 nüvəli konfiqurasiyaya malik olacaq. Baza variantında tezliyi 3.0 GHz olub, standart vəziyyətdə ən yüksək tezliyi isə 8 P nüvələrinin hamısı işləməklə 5.5 GHz olaraq verəcək. Ən yüksək performansı üçün isə 350 Vt enerji sərf edir. Lakin Intel Core i9-13900K prosessoru naməlum şəxs tərəfindən sürət aşırtma edildikdən sonra təməl vəziyyətində 8GHz tezlikdə işləyib.
Sınaq zamanı Z790 ana lövhəsi, LN2 soyutma (maye azot) istifadə edilib və prosessora 1792 Volt gərginlik verilib. Intel prosessoru 8.0GHz tezliyə SMT(Simultaneous Multi Threading) bağlı olduqda, yəni 8 P nüvələrinin hamısının işlədiyi vəziyyətdə çatıb. Bildirilir ki, qarşıdakı sınaqlarda sadəcə bir nüvəyə sürət aşırtma edildikdə 8GHz-dən xeyli yüksək nəticə əldə ediləcək.
Intel tərəfindən 13-cü nəsil “Raptor Lake” prosessorlarının nə vaxt bazara çıxarılacağı hələ ki, dəqiq deyil. Ehtimallara görə 20 oktyabr tarixindən etibarən prosessorlar satışda olacaq.
