Bir neçə gün bundan əvvəl Xiaomi şirkətinin saf Android smartfon üzərində işlədiyi ilə bağlı xəbərlər ortaya çıxmışdı. Lakin həmin xəbərlərdə bəhsi keçən smartfonların ən azından Snapdragon 778G kimi orta-üst seqment çipsetlərlə təchiz olunacağı deyilirdi. Ötən gün Xiaomi şirkətinin Redmi brendi özünün ilk saf Android cihazı adlandıra biləcəyimiz Redmi A1 modelini təqdim edib. Heyif ki, bu model büdcəvi giriş seqmenti smartfon olub çox zəif texniki xüsusiyyətləri özündə birləşdirir.
Redmi A1 modelinin texniki xüsusiyyətləri
Yeni Redmi A1 modeli çox ucuz qiyməti ilə fərqlənən sanki, Redmi 9A əsaslı gövdəyə malik giriş səviyyəsi bir smartfon hesab edilir. Redmi 9A ilə müqayisə edildikdə Helio G25 əvəzinə Helio A22 çipseti ilə təchiz edildiyini görürük. Performans cəhətdən Helio G25 çipsetindən biraz zəifdir. LPDDR4X operativ yaddaş və eMMC 5.1 yaddaş çipinə malikdir.
Redmi A1 modeli 6.52 düymlük HD+ təsvir ölçülü LCD ekrana malikdir. Təxmin etdiyiniz kimi ekranın görüntü yeniləmə tezliyi 60Hz təşkil edir. Arxa tərəfdə 8MP F/2.0 əsas, 2MP F/2.2 dərinlik sensoru mövcuddur. Ön tərəfdə isə 5MP selfi kamerası quraşdırılıb.
5000 mAs batareyası 10 Vt ilə şarj edilə bilər. MicroSD, 3.5 mm qulaqlıq girişi və.s mövcuddur. Ən qəribə cəhəti isə Android 12 Go əməliyyat sistemi ilə təchiz olunmasıdır. Android 12 Go isə heç bir MIUI interfeysinə sahib deyil. Redmi A seriyası daxilində daha güclü saf Android cihazlar görüb-görməyəcəyimizdən əmin deyilik. Redmi A seriyasının başlanması, Mi A seriyasına ad cəhətdən bənzərlik və cihazın da saf Android ilə gəlməsi sızdırılmış xəbərləri gücləndirir.
Qapalı anons edilmiş Redmi A1 modelinin qiyməti isə təqribi 80 dollar təşkil edir. Smartfonun Azərbaycana gəlib-gəlməyəcəyi məlum deyil. Giriş seqmenti ucuz smartfon axtaranlar üçün maraqlı seçim ola bilər.
