Beləliklə, Xiaomi brendi uzun müddətdir ki, gözlənilən ilk şaquli qatlanan smartfonu Mix Flip və ənənəvi Mix Fold 4 modellərini təqdim edib. Bununla isə Mix seriyasında çeşidlilik artıb deyə bilərik. Çində baş tutan təqdimat tədbirində bütün diqqətləri öz üzərinə cəlb etməyi bacaran smartfonlar olduqca yüksək performansa malikdir. Gəlin onlarla daha yaxından tanış olaq.
İlk öncə Xiaomi brendinin ilk şaquli qatlanan smartfoni Mix Flip modeli ilə başlayaq. Belə ki, smartfon öz gücünü flaqman Snapdragon 8 Gen 3 çipsetindən alır. Çinli brendin ilk şaquli qatlanan smartfonu öz sinfinin ən güclülərindəndir. Smartfonun ön hissəsində 6,86 düymlük OLED mövcuddur. Hansı ki, Dragon Crystal Glass texnologiyası ilə qorunan bu panel 1.5K təsvir ölçüsünə, 3000 nit maksimal parlaqlığa, 2.160Hz PWM qaralma və 1-120Hz arasında dəyişən yeniləmə tezliyinə sahibdir. Smartfonun qapaq hissəsində və ya xaricində isə yenə 1-120 Hz yenilənmə tezliyinə, 1.5K təsvir ölçüsünə malik 4.01 düymlük OLED ekran bizi qarşılayır. Lakin bu ekranda parlaqlıq sadəcə 1600 nitdir.
Qeyd edək ki, smartfonun qapaq ekranı adlandıra biləcəyimiz xarici paneldə smartfonu götürmədən zəng etmək, video söhbət etmək, mesajlara cavab vermək mümkündür. 192 qram ağırlığında və 7,8 mm nazikliyində olan Xiaomi Mix Flip 500 min dəfə qatlanmağa davamlıdır. IPx8 sertifikatı ilə gələn smartfon 1.5 metrə qədər dərinliyə sahib olan su hövzələrində 30 dəqiqə və ya daha çox dayana bilir. Smartfonun Snapdragon 8 Gen 3 ilə təchiz olunduğunu bildirmişdik. Bundan əlavə isə smartfon 4780 mAs batareya həcminə sahibdir. Həmçinin, smartfon 67 Vt sürətli şarj dəstəkləyir.
Kamera tərəfində isə bizi Leica imzalı kamera sensorları qarşılayır. Belə ki, smartfon 50MP (Light Hunter 800 f/1.7) əsas, və 50MP telefoto kamerası ilə dəstəklənir. Bundan əlavə, Mix Flip 4K 60FPS video qeydini də dəstəkləyir. Smartfonun ön tərəfində isə bizi 32MP kamera qarşılayır. Qiymət tərəfində isə smartfon Çin bazarı üçün 12GB+256GB versiyası üzrə 5999 Yuan və ya təxmini 825 dollara, 12GB + 512GB üçün 6499 Yuan və ya 893 dollara, 16GB + 1TB isə 7299 Yuan və ya 1000 dollara təklif olunur.
Yeni Mix Fold 4 bizlərə nə təklif edir?
Ötən günlərdə təqdim edilən daha bir qatlanan Xiaomi modeli isə Mix Fold seriyasının yeni üzvü olan Mix Fold 4 modelidir. Belə ki, Lei Jun tərəfindən təqdim edilən smartfon tamamilə karbon lif dizaynı və daha incə, yüngül dizaynı ilə rəqiblərindən fərqlənir. Xiaomi Mix Fold 4 modelində düzbucaqlı arxa kamera modulunun dizaynını bir qədər dəyişib. Kamera modulu əvvəlki modeldən daha böyükdür və onun alt kənarı biraz daha yuvarlaq olub. Smartfonun güc düyməsi Godix tərəfindən istehsal edilən barmaq izi skaneri kimi də fəaliyyət göstərir.
Qeyd edək ki, yeni flaqman smartfon Dragon Bone Engine 2.0 texnologiyasına malikdir və bu texnologiyanın etibarlılığı artırdığı və incəliyi qoruduğu deyilir. Mix Flip kimi Mix Fold 4 modeli də 500 min dəfə qatlanmağa davamlıdır. Smartfon qatlandıqda 9,47 mm, açıldıqda isə 4,59 mm qalınlığa sahibdir. Həmçinin smartfon sadəcə 226 qram ağırlığındadır və Honor Magic V2-dən həm nazik, həm də yüngüldür. Mix Fold 4 modeli 6,56 düymlük xarici və 7.98 düymlük daxili ekranlara sahibdir. Hər iki OLED ekran 120 Hz yeniləmə tezliyi, 3000 nit parlaqlıq və Dolby Vision dəstəyi təklif edir.
Ümumiyyətlə, Xiaomi bu dəfə ekran altı kamera texnologiyasından istifadə edir. Xiaomi MIX Fold 4, Leica tərəfindən imzalanmış dördlü arxa kamera moduluna sahibdir. Bu kameralara isə 50MP əsas, 12MP ultra geniş bucaqlı, 2x böyütmə təklif edən 50MP telefoto və 5x böyütmə edən 50 MP periskop kamerası aiddir. Təbii ki, Mix Fold 4 modeli də Snapdragon 8 Gen 3 çipsetinə sahibdir. Batareya tərəfində isə smartfon 67 Vt sürətli şarj və 50 Vt naqilsiz şarj dəstəkləyən 5100 mAs batareya həcminə sahib olub. Xiaomi MIX Fold 4 qara, ağ və mavi rəng seçimlərinə sahibdir. Qiymət tərəfində isə smartfonun Çindəki başlanğıc qiyməti 1237 dollardır. 16 GB RAM + 512 GB versiyası 1375 dollar, 16GB RAM + 1TB versiyası isə 1513 dollarlıq qiymət etiketinə sahib olub.
