Xiaomi şirkətinin ağıllı saatları, daha doğrusu ağıllı “qolbaqları” bəlkə də öz sinfində satış ədədlərinə görə liderdir. Kütləvi yerlərə çıxdığınız zaman kiçikdən-böyüyə bir çox insanın qolunda Xiaomi Mi Band seriyası saatları rahatlıqla görmək mümkündür. Belə ki, münasib qiyməti, keyfiyyəti və sahib olduğu xüsusiyyətləri ilə önə çıxan bu Mi Band seriyası bir neçə ay əvvəl yenilənmişdi. Redmi Note 11T seriyasının Çindəki təqdimatı zamanı Mi Band seriyası yeni adla qarşımıza çıxmışdı. Təbii ki, yeni ad dedikdə Mi hissəciyinin atılmasını nəzərdə tuturuq. Cihaz Xiaomi Mi Band 7 yox, Xiaomi Band 7 adlandırılmışdı. Xiaomi Band 7 modeli 25% nisbətində böyümüş ekranı və həmişə açıq ekran (Always On Display) xüsusiyyəti ilə diqqət çəkirdi. Lakin Xiaomi bu il fərqlilik edərək ağıllı saatın “Pro” versiyasını hazırlayır. Beləliklə növbəti həftə Xiaomi Band 7 Pro modeli təqdim ediləcək.
Xiaomi Band 7 Pro indiyə qədər çıxarılmış ən mükəmməl “Mi” Band modeli olacaq
Mi Band seriyasına aid hansısa ağıllı saatı istifadə etmisinizsə yəqin ki, “Kaş bunun ekranı biraz da böyük olaydı” deyə fikirləşmisiniz. Bəlkə də fikirləşməmisiniz, amma Xiaomi firması bunu düşünərək nisbətən daha böyük ekrana sahib “Pro” modelinin təqdim ediləcəyini təsdiqləyib. Xiaomi 12S seriyası ilə birlikdə nümayiş etdiriləcək ağıllı saat sadə versiyasına görə bəzi üstünlüklərə sahib olacaq.
Həmin üstünlüklər isə daha peşəkar idman və sağlamlıq analizləri cəhətdən özünü göstərəcək. Ölçüsü də böyüdüyü üçün Band 7 Pro modeli təkmilləşdirilmiş GPS xüsusiyyətləri və yüksək tutuma malik batareya ilə təchiz ediləcək. Bəzilərinin Mi Band modellərində bəyənmədiyi qayışlar ənənəvi saatlardakı standart qayışla əvəzlənəcək. Saatın materialında da yaxşılaşdırmaların ediləcəyi gözlənilir. Texniki detallarla bağlı təəssüf ki, heç bir informasiya verilməyib.
Ehtimallara görə şəkildəki ağıllı saatın qiyməti təqribən 60$ səviyyələrində dəyişəcək. Qlobal bazara eyni adla gəlib-gəlməyəcəyi məlum deyil. Xiaomi 12S seriyasının yalnız Çin bazarı üçün hazırlandığı bildirilir. Bu seriyanın qlobal kanallardan təqdimatı həyata keçirilsə də satışa çıxarılmayacağı barədə iddialar mövcuddur. Ümid edirik, eyni hal Xiaomi Band 7 Pro üçün yaşanmayacaq.
