Xiaomi bu gün təşkil etdiyi tədbir çərçivəsində maraqla gözlənilən Xiaomi 14T və Xiaomi 14T Pro modellərini və brendin ilk ilk şaquli qatlanan smartfonu Mix Flip-i qlobal versiyada təqdim edib. Xatırladaq ki, Xiaomi bu ilin əvvəlində bizlərə yeni Xiaomi 14 seriyasını təqdim etmişdi. Çinli smartfon nəhəngi bu gün, Berlində təşkil etdiyi tədbir çərçivəsində Xiaomi 14T və Xiaomi 14T Pro modellərini təqdim edib.
Qlobal bazarlarda satışa çıxarılacaq smartfonların texniki xüsusiyyətləri və eləcə də qiymətləri elan edilib. Gəlib görək smartfonlar nələr təklif edir? Həm Xiaomi 14T Pro, həm də 14T-də displey eyni 20:9 aspekt nisbətində 6,67 düymlük 1,5K AMOLED ekrandır. Hansı ki, bu ekran 2712 x 1220 piksel təsvir ölçüsünə və 4000 nit parlaqlığa malikdir. Bu displeylər həmçinin 144Hz yeniləmə tezliyi ilə gəlir. Xiaomi bu ekranların təhlükəsizliyini təmin etmək üçün Gorilla Glass Victus 2-ə üstünlük verib. Əlavə olaraq isə smartfon ekranları Dolby Vision və HDR10+ xüsusiyyətlərinə sahib olub.
Hər iki telefon düşməyə qarşı dayanıqlığı artırmaq üçün yüksək güclü 6M13 alüminium ərintisindən hazırlanmışdır. Xiaomi 14T Pro və 14T-də ekranın bədənə nisbəti 93,3 faiz olduğu halda, alt kənarındakı naziklik cəmi 1,9 mm-dir. Hər iki cihazın şüşə arxası olsa da, Xiaomi 14T Pro MediaTek-in ən son Dimensity 9300+ ilə gəlir. Xiaomi 14T modelinə Dimensity 8300-Ultra çipi daxildir. Kamera tərəfində, 14T Pro, Xiaomi 14-də istifadə edilən eyni əsas Xiaomi xüsusi görüntü sensoru olan Light Fusion 900-ə malikdir. Bu kamera OIS dəstəyi ilə 50 MP 1/1.31″ f/1.6 sensordur. İkinci kamera Vario-Summulix 50 MP 1/2.76 ″ f/2.0 telefoto, üçüncü kamera isə 120 dərəcə FOV olan 12 MP OV13B f/2.2 ultra geniş kameradır. Digər tərəfdən Xiaomi 14T, OIS ilə 50MP əsas Sony IMX906 f/1.7 sensora, ikinci dərəcəli 50MP f/1.9 telefoto kameraya və 14T Pro ilə eyni ultra geniş 12MP f/2.2-ə malikdir.
Hər iki smartfon 32MP selfie kamerasına sahib olub və bütün sensorlarda Leica imzası yer alır. Həm 14T, həm də 14T Pro modelləri 5000 mAh batareyaya malikdir. 14T Pro modeli seriyanın sadə modelindən fərqli olaraq 120Vt sürətli şarj təklif edir. Xiaomi 14T isə 67Vt sürətli şarj təklif edir. Habelə, 14T Pro 50Vt simsiz şarj təklif etdiyi halda 14T modelində bu funksiya mövcud deyil. Yaddaş tərəfində Xiaomi 14T 256 GB əsas yaddaş və 12 GB RAM ilə təklif olunur. Proqram təminatı baxımından smartfonlar Android 14 əsasında HyperOS ilə təklif olunur. Xiaomi 14T və 14T Pro bu gündən qlobal olaraq mövcuddur. Xiaomi 14T-nin başlanğıc qiyməti 649 avro olaraq təyin olunub. Xiaomi 14T Pro-nun başlanğıc qiyməti isə 799 avrodur. Bundan əlavə smartfonu əldə edənlər 4 ay pulsuz Spotify Premium və 3 aylıq YouTube Premium əldə edirlər.
İlk şaquli qatlanan Xiaomi smartfonu Mix Flip qlobal versiyada
Qeyd edək ki, Berlində təşkil edilən tədbirdə təqdim edilən digər smartfon da brendin ilk şaquli qatlanan modeli Mix Flip olub. Xatırladaq ki, Xiaomi bu modeli ötən aylarda Mix Fold 4 ilə birlikdə Çində təqdim etmişdi.
Smartfon öz gücünü flaqman Snapdragon 8 Gen 3 çipsetindən alır. Çinli brendin ilk şaquli qatlanan smartfonu öz sinfinin ən güclülərindəndir. Smartfonun ön hissəsində 6,86 düymlük OLED mövcuddur. Hansı ki, Dragon Crystal Glass texnologiyası ilə qorunan bu panel 1.5K təsvir ölçüsünə, 3000 nit maksimal parlaqlığa, 2.160Hz PWM qaralma və 1-120Hz arasında dəyişən yeniləmə tezliyinə sahibdir. Smartfonun qapaq hissəsində və ya xaricində isə yenə 1-120 Hz yenilənmə tezliyinə, 1.5K təsvir ölçüsünə malik 4.01 düymlük OLED ekran bizi qarşılayır. Lakin bu ekranda parlaqlıq sadəcə 1600 nitdir.
Qeyd edək ki, smartfonun qapaq ekranı adlandıra biləcəyimiz xarici paneldə smartfonu götürmədən zəng etmək, video söhbət etmək, mesajlara cavab vermək mümkündür. 192 qram ağırlığında və 7,8 mm nazikliyində olan Xiaomi Mix Flip 500 min dəfə qatlanmağa davamlıdır. IPx8 sertifikatı ilə gələn smartfon 1.5 metrə qədər dərinliyə sahib olan su hövzələrində 30 dəqiqə və ya daha çox dayana bilir. Smartfonun Snapdragon 8 Gen 3 ilə təchiz olunduğunu bildirmişdik. Bundan əlavə isə smartfon 4780 mAs batareya həcminə sahibdir. Həmçinin, smartfon 67 Vt sürətli şarj dəstəkləyir.
Kamera tərəfində isə bizi Leica imzalı kamera sensorları qarşılayır. Belə ki, smartfon 50MP (Light Hunter 800 f/1.7) əsas, və 50MP telefoto kamerası ilə dəstəklənir. Bundan əlavə, Mix Flip 4K 60FPS video qeydini də dəstəkləyir. Smartfonun ön tərəfində isə bizi 32MP kamera qarşılayır. Qiymət tərəfində isə smartfon qlobal bazar üçün sadəcə 12-512GB yaddaş versiyasında 1299 avro qiymət etiketi ilə satışa çıxarılıb.
