Çin avtomobil sənayesi dünyanın ən sürətli şarj olan elektromobil batareyası ilə bütün diqqətləri öz üzərinə cəlb edib. Belə ki, CATL və SAIC-GM ilə əməkdaşlıqda hazırlanmış bu batareya 6C kimi cəlbedici şarj sürəti təklif edir.
General Motors-un Çindəki birgə müəssisəsi olan SAIC-GM və batareya nəhəngi CATL dünyanın ən sürətli şarj olan elektromobil batareyası üçün bir araya gəliblər. Litium Dəmir Fosfat (LFP) strukturuna əsaslanan bu batareya Geely-nin əvvəlki rekordu olan Golden Battery-ni (5,5C) ötərək inanılmaz dərəcədə 6C doldurma sürətinə çatır. Yeni batareya gələn ildən General Motors-un 900 voltluq Ultium platformasında istifadə olunacaq. Şarj prosesinin səmərəliliyini artırmaq və sabit performansa nail olmaq üçün xüsusi elektrolitdən istifadə edilmişdir. Sözügedən elektrolit keçiriciliyi artırmaq və özlülüyünü azaltmaq üçün optimallaşdırılmış formulaya malikdir. Yeni formula litium ionlarının hərəkətini sürətləndirərək, batareyanın daha səmərəli işləməsinə şərait yaradır.
Əvvəldə qeyd etdiyimiz Golden Battery 10,5 dəqiqə ərzində 10%-dən 80%-ə qədər doldurula bilər. Bununla belə, SAIC-GM və CATL şirkətləri tərəfindən hazırlanmış yeni batareya bu vaxtı 10 dəqiqədən də az azaltmaq potensialına malikdir. Bu inkişaf, doldurma vaxtlarını daxili yanma mühərrikli avtomobillərin yanacaq doldurma müddətlərinə yaxınlaşdırmaqla, elektrikli nəqliyyat vasitələrinin daha sürətli mənimsənilməsini təmin edə bilər. SAIC-GM-dən verilən açıqlamada 6C batareyasının cəmi 5 dəqiqəlik şarjla 200 kilometrdən çox məsafə qət edə biləcəyi bildirilib.
