Məşhur DxOMARK mütəxəssisləri Xiaomi brendinin ötən aylarda təqdim edilən flaqman 13 Ultra modelinin kamera performansını ölçüblər. Təəssüf ki, flaqman modelin kamera performansı gözlənilən nəticəni verməyib. Belə ki, sadəcə 140 xal toplayan smartfon ən yaxşı kameralı 10 smartfon siyahısına daxil ola bilməyib. Xiaomi 13 seriyasının ən performanslı modeli hesab olunan 13 Ultra bir çox rəqibindən geridə qalıb. Hətta smartfon Xiaomi Mi 11 Ultra modelindən də aşağı performans göstərib.
Xatırladaq ki, Xiaomi 13 Ultra modeli 4 fərqli kamera sensoru ilə təchiz edilib. Belə ki, cihazın əsas kamerası 1 düymlük Sony IMX989 50MP sensorudur. Digər 3 fərqli kamera sensoru isə 1/2.51 düym ölçülü Sony IMX858 50MP sensorları ilə gücləndirilib. Qeyd edək ki, bu kameralar 1 ədəd sadə telefoto, 1 ədəd periskopiik-telefoto və 1 ədəd ultra-geniş bucaqlı kameralardır. Onlardan birincisi 75 mm fokus məsafəsinə malik olub 3.2 qat optik yaxınlaşdırma vəd edərkən, F/3.0 obyektivli 120 mm fokus məsafəli ikinci kamera 5 qat optik yaxınlaşdırma edə bilər. Eyni zamanda ultra-geniş bucaqlı kamera xaric olmaqla digər 3 kameramız OIS ilə gücləndirilib. Lakin bütün bu göstəricilərə baxmayaraq flaqman smartfon ümumi smartfon reytinqində kamera performansına görə 14-cü yeri tutub.
Xiaomi 13 Ultra modeli əzəli rəqiblərindən olan iPhone 14 Pro və Pro Max modellərindən geri qalıb. Hətta smartfon iPhone 13 və iPhone 13 Pro Max modellərindən az xal toplayıb. Qeyd edək ki, smartfonun ən böyük mənfi xüsusiyyətlərindən biri düymənin basılması ilə çəkilişin başlaması arasındalı uzun gecikmə olub. Həmçinin gün işığında həddindən artıq doymuş rənglər və video rejimidəki optimizasiya problemləri, o cümlədən HDR fotoşəkillərdə qeyri-təbii dəri tonu cihazın ən böyük mənfi xüsusiyyətlərindən olub. Lakin bütün bunlara baxmayaraq cihaz bütün zoom məsafələrində əla görüntü keyfiyyəti, yaxşı aşağı işıq performansı göstərib.
