Bir çox texnologiya şirkətindən sonra nəhayət Samsung brendi də gələcəyin ChatGPT kimi süni intellektli çatbot texnologiyalarında olduğunu gördü. Belə ki, texnologiya nəhəngi özünə aid ChatGPT bənzəri yeni süni intellekt çatbotu hazırlayır. Xatırladaq ki, şirkət ötən günlərdə işçilərinə ChatGPT süni intellekt çatbotundan istifadə etməyi qadağan etmişdi. Görünən odur ki, OpenAI şirkətinə güvənməyən brend öz süni intellekt çatbotundan istifadə edəcək. Ortaya çıxan məlumatlara görə Samsung özünəməxsus LLM dil modeli üzərində işləyir. Hətta layihə inkişaf mərhələsindədir. Yəni Koreyalı şirkət bir müddətdir ki, bu çatbot üzərində çalışır.
İnsayderlər iddia edir ki, Samsung ChatGPT bənzəri süni intellekt əsaslı çatbot alətini 2 ay ərzində tamamlamaq istəyir. Bu isə o deməkdir ki, 2 ay sonra artıq Koreyalı brend yeni süni intellekt çatbotunu elan edə bilər. Lakin ilk olaraq çatbot brendin özü tərəfindən istifadə olunacaq. Yəni sənədlərin ümumiləşdirilməsi, proqram təminatı və dil tərcüməsi kimi prosesslərdə məhz bu çatbotdan istifadə olunacaq. Samsung iddia edir ki, bu cür süni intellekt alətləri məhz proqram təminatının inkişafına səbəb ola bilər. Həmçinin yarımkeçiricilərin dizaynı üçün lazım olan vaxt bu texnologiya ilə əhəmiyyətli dərəcədə azala bilər.
Üumiyyətlə Samsung ChatGPT bənzəri süni intellektli çatbot texnologiyası üzərində çalışmadan əvvəl OpenAI ilə danışıqlar aparmışdı. Lakin daha sonra şirkət öz süni intellekt çatbotunu hazırlamağa qərar verib. Samsung əsasən ChatGPT texnologiyasının hakerlər üçün əlçatan olduğunu bildirir. Yəni texnologiya nəhəngi orada olan məlumatların təhlükəsizliyindən şübhə edir.
