Xiaomi firması hər il payız aylarının əvvəli özünün flaqman “T” seriyası smartfonlarını yeniləyir. Xatırlayırsınızsa Xiaomi 11T seriyası ilə birlikdə şirkət “T” seriyası üçün strategiya dəyişikliyi etmişdi. Hansı ki, Xiaomi 11T seriyasına qədər təqdim edilmiş smartfonlar performans cəhətdən eyni qalırdı. Lakin kamera texnologiyaları “Pro” modeldə daha güclü olurdu. Xiaomi 11T seriyasında isə istehsalçı bunun tam tərsini etdi. Yəni Xiaomi 11T Pro modelində Snapdragon 888 çipseti işlədilərkən, sadə model Dimensity 1200 ilə çıxarıldı. Kameralar isə hər iki cihazda eyni qaldı. Əslində, kamera xüsusiyyətlərinə görə də Xiaomi 11T seriyası özlüyündə xeyli zəiflədilmişdi. Çünki, kameralardan kəsilən büdcə ekran panellərinin AMOLED olması üçün ayrılmışdı. İndi isə, Xiaomi 12T seriyası yaxınlaşır və bəzi mənbələr Xiaomi 12T Pro modeli ilə bağlı ilkin məlumatları bölüşüblər.
Xiaomi 12T Pro modeli verilənlər bazasında görülüb!
Smartfon 22081212UG model nömrəsinə sahibdir. 22 08 rəqəmini görürüksə böyük bir ehtimalla cihaz oktyabr ayına qədər təqdim edilmiş olacaq. Əksər hallarda Xiaomi firması model nömrəsinin ilk iki rəqəmində qeyd edilmiş tarixdən maksimum 2 ay sonra cihazı artıq bazara çıxarmış olur. Yəni gecikməsə sentyabr ayı, geciksə oktyabr ayına qədər smartfonlar bazarda olacaq. Xiaomi 12T Pro modeli ilə bağlı rəsmi məlumatlar hələlik məlum olmasa da cihaz barədə bəzi detallar artıq sızdırılıb.
Belə ki, “diting” kod adına sahib Xiaomi 12T Pro modeli Çində də satışa çıxarılması gözlənilən Redmi K50S Pro modelinin təkrar brendləşdirilmiş versiyası olacaq. Smarton öz gücünü Snapdragon 8+ Gen 1 çipsetindən alacaq. Lakin smartfonun ən diqqət çəkən xüsusiyyəti kamera sensorudur.
Cihaza Samsung tərəfindən istehsal olunan 200MP kamera sensorlarından birinin quraşdırılması gözlənilir. Xiaomi firması 108MP kameraya malik ilk smartfonu birinci təqdim etsə də, 200MP kameralı ilk telefon ünvanını Motorola brendinə uduzacaq. Xiaomi 12T Pro modelinə 120Hz OLED ekran paneli, 5000 mAs həcmli 120 Vt sürətli doldurma dəstəkləyən batareya quraşdırılacaq.
Sadə Xiaomi 12T modeli isə öz gücünü Dimensity 8100 çipsetindən alacaq və deyilənə görə kamerası naməlum 50MP sensorla əvəzlənəcək. Lakin dizayn və ekran texnologiyaları cəhətdən Xiaomi 12T Pro modeli ilə bənzərlik daşımalıdır. Xüsusilə Xiaomi 12T modeli OLED ekrana və Dimensity 8100 çipsetinə sahib olarsa yüksək satış ədədləri əldə edə bilər. Hələ ki, iddia edilən məlumatlar bu şəkildədir. İddiaların nə qədər doğru olduğunu isə təqdimatdan sonra öyrənəcəyik.
