Rusiya dövləti 1998-ci ildən bu yana Beynalxalq Kosmik Stansiyada digər dünya ölkələrinin kosmik tədqiqatçıları ilə birlikdə təmsil olunur. Məlum məsələdir ki, Ukrayna müharibəsi ərəfəsində Rusiya bir xeyli çətinliklərlə qarşılaşdı. Nəticədə Rusiyanın təmsil olunduğu hər yerdə müxtəlif problemlər baş qaldırdı. Bütün Rusiya adının hallandığı sektorlarda olduğu kimi, Kosmik Stansiyada da bəzi gərginliklər müşahidə olundu. Roscosmos kosmik agentliyinin əvvəlki rəhbəri Dmitry Rogozin bəzi təkliflər verərək qərbin Rusiyaya qoyduğu sanksiyaları sonlandırmasın, əks halda BKS-də əməkdaşlığa son qoyacaqlarını bildirmişdi. Lakin iyulun əvvəlində Dmitry Rogozin istefaya göndərildi və onu keçmiş baş nazir müavini Yuri Borisov əvəz etdi. Göründüyü qədərilə Yuri Borisov da elə Roscosmos-un əvvəlki rəhbərinin yolunu izləyir. Çünki, Yuri Borisov Rusiya dövlətinin 2024-cü ildən Beynəlxalq Kosmik Stansiyadan ayrılacağını bildirib.
Rusiya Beynəlxalq Kosmik Stansiyadan ayrılacağı təqdirdə bəzi çətinliklər yaşana bilər
Rusiya tərəfindən Beynəlxalq Kosmik Stansiyaya bəzi modullar aparaılıb. Hansı ki, bu modullar stansiyanın enerji ilə təmin edilməsi üçün istifadə edilən günəş panellərini özündə birləşdirir. Üstəlik bu modullar Kosmik Stansiyanın orbitdə qalmasına imkan verən hərəkəti təmin edir. Yəni modullar olmadığı təqdirdə stansiyanın öz trayektoriyasını qorumasnda da bəzi çətinliklər yaranacaq. Rusiya stansiyadan ayrıldığı təqdirdə öz avadanlıqlarına nə edəcəyi məlum deyil.
Rusiyanın hədəfində orbitə öz kosmik stansiyasını qurmaq fikri olduğu bildirilir. Lakin bunun həyata keçirilməsi o qədər də inandırıcı görünmür. Səbəb isə ilk növbədə maliyyə problemləri və orbitə kosmik stansiya yerləşdirməkdə Rusiyanın lazımi yüksək texnologiyalara sahib olmaması kimi göstərilir.
Qeyd edək ki, Rusiya və Amerika Beynəlxalq Kosmik Stansiyaya uçmaq üçün bir-birlərinin kosmik uçuş aparatlarını istifadə edəcək. İki ölkə bununla bağlı müəyyən razılığa gəlib. Razılıq isə sentyabr ayından sonrakı uçuşlarda qüvvəyə minəcək.
Mövzu ilə bağlı siz nə düşünürsünüz? Fikirlərinizi rəylərdə bizimlə bölüşə bilərsiniz.
