Tecno brendi Çinli bir şirkət olaraq 2006-cı ildən bu yana telefon istehsalı ilə məşğuldur. Lakin xüsusilə uğurlu inkişafı son 4 ildə baş tutub ki, Afrikada büdcə modellərin uğurlu satış strategiyası ilə lazımi yerlərə gəlməyi bacarıb. Son 1 il ərzində isə ölkəmizdə də Tecno brendinin sürətlə böyüməyə çalışdığını müşahidə edə bilərsiniz. Daim yenilənən model xətti, üst seqmentə doğru atılan addımlar bunun gözəl nümunəsidir. Belə ki, şirkət MWC 23 sərgisində də trenddən geri qalmayıb, yeni bir modeli və daha doğrusu qatlana bilən modeli Tecno Phantom V Fold ilə qarşımıza çıxdı. Tecno Phantom X2 Pro modelindən sonra, Tecno Phantom V Fold modeli şirkətin üst seqmenti hədəf aldığı ikinci model olaraq nəzərdə tutulur.
Tecno Phantom V Fold modeli ilk dəfə belə bir cihaz hazırlayan brend üçün xeyli təəccübləndirici detallara malikdir
Smartfonun sahib olduğu mühəndislik ilk dəfə qatlanan bir cihaz üçün təəccübləndirici səviyyədə qiymətləndirilir. Çünki, diqqət çəkən birinci nüans smartfonun qatlanarkən arada heç bir boşluq buraxmamasıdır. İllərdir qatlanan smartfon istehsal edən rəqiblərin bəzisində hələ də qatlanmış vəziyyətdə ekran panelləri bir-birinə yaxınlaşmaqda əziyyət çəkərkən, Tecno Phantom V Fold belə problemdən əziyyət çəkmir.
Tecno Phantom V Fold modeli öz gücünü Dimensity 9000+ çipsetindən alır. Uyğun olaraq Snapdragon 8+ Gen 1 çipsetinə ekvivalent performans göstərir. Cihaz LPDDR5X və UFS 3.1 texnologiyaları ilə gücləndirilir.
Smartfonun daxilində 7.85 düymlük 2296 x 2000 piksel təsvir ölçülü qatlanan AMOLED ekran paneli işlədilib. 120Hz görüntü yeniləmə tezliyinə sahibdir. 10-120Hz arası dəyişə bilən ekranın tezliyi adaptivdir. Eyni zamanda bu ekran 200.000 dəfə qatlanıb-açılmağa uyğun şəkildə hazırlanıb. Xaricdəki ekranımız da bu cihazda AMOLED panellə gücləndirilib. Həmin ekran isə ideal ekranın gövdə nisbətinə sahib olduğundan, ensiz və uzun görünən dizayna malik deyil. Əldə tutduğunuz zaman normal bir smartfon hissiyatı yaşadır. Keyfiyyət LTPO texnologiyalı 120Hz tezlikli 6.42 düymlük xarici ekranımız eyni zamanda minimum ekran çərçivələri ilə də fərqlənir.
Kamera baxımından isə Tecno Phantom V Fold modelinin arxasında dairəvi kamera adasına yerləşdirilmiş 3 fərqli sensor görürük. Əsas kameramız 1/1.3 düymlük 50MP sensor ilə gücləndirilib. İkinci kameramız da 50MP təsvir ölçüsünə malik olub 2 qat optik yaxınlaşdırma dəstəkləməkdədir. Sona isə 13MP təsvir ölçülü ultra-geniş bucaqlı kamera qalır. Əsas kameradan əlavə hər bir ekran üzərində də 1 ədəd olmaqla selfi kamerası quraşdırılıb. Xarici ekrandakı selfi kameramız 32MP təsvir ölçüsünə sahibdir, lakin ekran daxilinə quraşdırılmış selfi kamerasının təsvir ölçüsü 16MP təşkil edir.
Smartfonun daxilində 5000 mAs həcmli 45 vatt sürətli şarj dəstəkləyən batareya quraşdırılıb. Tədbir boyunca verilən məlumata görə cihaz 55 dəqiqədə 100% doldurula bilər. Android 13 əsaslı HiOS 13 interfeysi 1000-dən çox populyar tətbiq üçün qatlanan ekrana görə optimizasiya edilib. Bu da Tecno şirkətinin proqram təminatına da diqqət etdiyi mənası daşıyır. Smartfonun başlanğıc qiyməti isə eyni quruluşda olan rəqibləri ilə müqayisədə münasibdir. Tecno brendi bu cihazın başlanğıc qiymətini 256GB variantı üçün 1099$ olaraq təyin edib.
