Çin smartfon istehsalçılarından biri olan və xüsusilə Afrika bazarına fokuslanaraq inkişaf edən Tecno Mobile brendinin yeni Techno Phantom X2 seriyası təqdim olunub. Qeyd edək ki, Çinli brend ötən il Phantom X seriyasını təqdim etmişdi və bu seriyanın modelləri istifadəçilər tərəfindən bəyənilmişdi. İndi isə brendin yeni seriyasına aid olan Phantom X2 və Phantom X2 Pro modelləri təqdim olunub. Yeni modellərin ən çox diqqət çəkən xüsusiyətləri isə onun kamera tərəfindədir. Şəkillərdən də gördüyünüz kimi yeni smartfonlar olduqca qəribə və böyük kamera moduluna sahibdirlər. Smartfonların arxa tərəfinə nəzər saldıqda belə demək olar gözə ən çox elə kamera girir. Hətta Phantom X2 Pro smartfonu hərəkətli portret obyektivi ilə təchiz olunub.
Tecno Phantom X2 seriyası smartfonları bizə nə vəd edir?
İlk olaraq qeyd etmək lazımdır ki, Tecno Phantom X2 seriyası şirkət üçün flaqman modellər olaraq adlandırılır. Nəticədə performans cəhətdən baxdıqda hər iki smartfon Dimensity 9000 çipseti ilə təchiz olunub. Bundan əlavə isə sadə Phantom X2 modeli 8GB LPDDR5X operativ yaddaş, Phantom X2 Pro modeli isə 12GB LPDDR5X operativ yaddaş ilə təchiz edilib. Həmçinin hər iki smartfon UFS 3.1 texnologiyasına əsaslanan 256GB daxili yaddaş ilə təklif olunur.
Dimensity 9000 çipseti flaqman səviyyəli olsa da artıq ötən nəslin flaqman çipseti kimi nəzərdə tutulur. Snapdragon 8 Gen 2 və Dimensity 9100 çipsetləri artıq debüt etdiyindən Dimensity 9000 çipseti biraz mənfi bir detal olacaq.
Ekran paneli tərəfində isə Phantom X2 və Phantom X2 Pro modellərinin hər ikisinə 6,8 düymlük 120Hz tezlikli AMOLED ekran paneli quraşdırılıb. FHD+ təsvir ölçülü ekran paneli 387 ppi piksel sıxlığına sahibdir. Hər iki smartfonun ekran-gövdə nisbəti də eynidir yəni, 93.3% təşkil edir. Smartfonların ekranı Gorilla Glass Victus ilə qorunur. Ekranın kənarlardan qıvrımlara sahib olması premium görünüşlü hissiyat yaratsa da çənə qismi sanki, biraz qalın alınıb.
Smartfonlar kamera cəhətdən hansı xüsusiyyətlərə malikdir?
Qeyd etdiyimiz kimi, yeni smartfonların ən çox diqqət çəkən xüsusiyyəti elə məhz onun kamera tərəfindədir. Əslinə qalsa kamera modulu sadəcə görünüş cəhətdən böyükdür. Texniki cəhətdən ciddi bir “böyüklük” mövcud deyil. Məsələn, kameralarda ən azında OIS belə mövcud deyil. Belə ki, seriyanın Phantom X2 modeli 64MP təsvir ölçülü əsas kamera, 13MP təsvir ölçülü ultra-genişbucaqlı kamera, 2MP təsvir ölçülü dərinlik sensoru ilə təchiz olunub.
Phantom X2 Pro modeli isə 1/1.3 düymlük 50MP ISOCELL GNV əsas kamera sensoru ilə, 50MP ISOCELL JN1 təsvir ölçülü 2.5 qat yaxınlaşdırma edə bilən telefoto kamera sensoru ilə təchiz olunub. Qeyd edək ki, bu smartfonun telefoto kamera sensoru hərəkətli obyektivə malikdir. Hərəkətli obyektiv isə telefoto kamerası ilə portret çəkilişlərində arxa tərəfi fiziki olaraq bulanıqlaşdırmağa işə yarayır. Hərəkətli obyektiv, aşağıdakı şəkildə də gördüyünüz kimi gövdədən kənara uzanır.
Əlavə olaraq isə 13MP ultra-genişbucaqlı kamera sensoru da eynilə mövcuddur. Qeyd edək ki, seriyanın hər iki smartfonu 4K təsvir ölçüsündə 60FPS video qeydə ala bilir. Bundan başqa isə hər iki smartfon 32MP selfi kamerası ilə də təchiz olunub.
Smartfonların yerdə qalan xüsusiyyətlər nələrdir?
Yeni Tecno Phantom X2 seriyası daxilində olan hər 2 smartfon modeli 45 Vatt naqilli şarj dəstəkləyir. Həmçinin hər iki smartfon 5160 mAs həcmli batareya ilə təchiz olunub. 60 dəqiqədə 100% şarj etmək mümkündür.
Smartfonların qiyməti
Gələn həftə satışa çıxarılması planlaşdırılan Phantom X2 seriyası, başlanğıc qiyməti 720$ olan Phantom X2 və başlanğıc qiyməti 930$ olan Phantom X2 Pro smartfonlarından ibarətdir. Qeyd edək ki, bu qiymətlər yalnız Səudiyyə Ərəbistan üçün keçərlidir. Digər ölkələrdə qiymətlərin necə olacağı məlum deyil. Əgər qiymət bu cür olsa, şirkətin modellərinin satış ədədlərinin yüksək olması şübhə altındadır.
