Gündəlik həyatımızda demək olar ki, həryerdə qarşılaşdığımız kameralarda insanları görünməz edən kostyum hazırlanıb. Belə ki, Çinin Wuhan Universitetinin tələbələri süni intellekt əsasında işləyən və insanları hər dəqiqə izləyən kameralarda insanları görünməz etməyin yolunu tapıblar. Qeyd edək ki, çinli tələbələr Huawei tərəfindən maliyyələşdirilən ilk kibertəhlükəsizlik innovasiya müsabiqəsində yeni texnologiyaları ilə birinci yerə layiq görülüblər. Yeni kostyumun adı isə InvisDefense adlandırılıb.
Süni intellektlə işləyən kameralarda insanları görünməz edə bilən kostyum necə işləyir?
Çinli tələbələr tərəfindən hazırlanan InvisDefense kostyumu gündüz sadə naxışlı kostyumdan fərqlənmir. Gecə isə termal cihazlar ilə təchiz olunmuş kostyum istilik yayaraq kameralarda görünməz ola bilir. Belə ki, süni intellekt əsasında işləyən, infraqırmızı, hətta termal görüntüləmə qabiliyyətinə malik kameralarda da InvisDefense kostyumundan istifadə edən şəxs görünməz olur. Qeyd edək ki, kostyumun əsas alqoritmini tərtib edən Wei Hui, InvisDefense kostyumunun hazırlanmasına çoxlu enerji sərf etdiklərini bildirib.
Əlavə olaraq qeyd edək ki, 2019-cu ildən bəri təhlükəsizlik kameraları ilə ciddi nəzarət sistemi yaradılmışdı. Bu kameralar süni intellekt vasitəsi ilə hər an və hər yerdə küçədə olan insanların hərəkətini izləyir. Bu nəzarət sistemi bir çox Çin vətəndaşı tərəfindən narazılıq ilə qarşılanmışdı. Wuhan Universitetinin tələbələri bildirir ki, artıq vətəndaşlar InvisDefense kostyumundan istifadə edərək təhlükəsizlik kameralarında görünməz ola bilərlər. Qeyd edək ki, çinli tələbələr gələcəkdə kostyumu 71 dollardan satmaq istəyirlər.
Kameralarda insanların görünməz edən kostyum maraqlı səslənsə də, bu məhsulun bazara çıxarılması üçün bir çox maneələr var. Ən böyük maneə isə təbii ki, Çin dövlətidir. Çünki yeni kostyum dövlətin nəzarət sisteminə qarşıdır. Buna baxmayaraq tələbələr gələcəkdə fərqli növ obyektlərə də eyni texnologiyanı tətbiq etmək istəyirlər.
