Qualcomm və Cənubi Koreyadakı tərəfdaşları arasında sızan hesabatlara görə, qarşıdan gələn Snapdragon 8 Gen 3 çipseti 2 fərqli variantda təqdim edilə bilər. Bunlardan biri TSMC-nin 4nm istehsal prosesində, digəri isə TSMC-nin 3nm texnoloji prosesi ilə qarşımıza çıxa bilər. Bu da Qualcomm şirkətinin bəzi məqamlardan xəbərdar olduğu və yeni strategiya inkişaf etdirdiyini ortaya qoyur.
Xəbər, Qualcomm və Samsung kimi smartfon tərəfdaşları arasında sızdırıldığı iddia edilən e-poçt danışıqlarını paylaşan Cənubi Koreyanın gamma0burst bloq resursundan gəlir. Sızdırılan sənədlərdə Qualcomm, qarşıdan gələn Qualcomm Snapdragon 8 Gen 3 çipsetinin CPU quruluşu üçün ARM-in ən son Cortex X4, Cortex A720 və Cortex A520 CPU nüvələrindən istifadə edəcəyini bildirilib.
Amma maraqlı olan odur ki, Qualcomm qarşıdan gələn Snapdragon 8 Gen 3 (SM8650) çipsetinin biri TSMC-nin 4nm N4P node prosesində, digəri isə TSMC-nin 3nm N3E node prosesində istehsal edilmiş iki variantda təqdim ediləcəyi ilə bağlı bir sətr əlavə edib.
Qualcomm-un nə üçün 2024-cü ildə Android flaqmanları üçün 8 Gen 3 prosessorunun 2 fərqli variantını yaratmağı gözlədiyi çaşqınlıq doğurur, lakin bəlkə də buna təəccüblənməmək lazımdır. Çünki, 3nm TSMC texnoloji prosesinin birinci nəslindən yararlanan Apple bu dəqiqə ciddi isinmə və enerji sərfiyyatının artması kimi problemlərlə qarşılaşır. Lakin deyəsən, Qualcomm bu problemlərə qarşı özünü qorumaq fikrindədir. İlk növbədə təkmilləşmiş 4nm istehsal prosesi ilə davam etmək performans baxımından 3nm texnoloji prosesindən heç də geri qalmayacaq. Üstəlik enerji sərfiyyatı baxımından çox optimal olacaq.
3nm texnoloji prosesi isə böyük bir ehtimalla 8+ Gen 3 ilə bizlərə təqdim ediləcək. Beləliklə, smarfonumda 3nm istehsal prosesindən istifadə etmişəm demək istəyən şirkətlər bu çipsetdən yararlana biləcəklər. Nəticə etibarilə ilkin ehtimallar bu cür görünür, nə qədər doğru olduğunu isə yaxın aylarda öyrənə biləcəyik.
