Samsung Unpacked tədbiri ənənəvi olaraq yay aylarında keçirilir. Bu il keçiriləcək tədbir haqqında məlumatı tanınmış insayder Evan Blass paylaşıb. Həmçinin insayder eyni zamanda rəsmi promo-materiallardan götürülmüş dəvətnamə görüntüsünü paylaşıb.
Tarixdən əlavə olaraq şəkil üzərində (hələ təqdim edilməmiş) Samsung Galaxy Flip 4 modelinin görüntüsünü də görmək mümkündür. Daha öncə bu görüntülər 91Mobiles resursu tərəfindən sızdırılmışdır.
Samsung Unpacked tədbirinin əsas cihazları: Galaxy Flip 4 və Galaxy Fold 4
Qarşıda baş tutacaq Samsung Unpacked tədbirinin gözlənilən əsas cihazlardan biri Galaxy Flip 4 modelidir. Bu ötən il çıxmış Z Flip 3 modelinin yenilənmiş versiyası olacaq. Əlavə olaraq qatlana bilən Samsung Galaxy Fold 4 modeli də təqdim olunacaq. İlkin məlumatlara görə, Fold 4 modelində dizayn öz sələfinə xeyli bənzəyəcək. Yalnız texniki göstəriciləri təkmilləşdiriləcək və bir sıra yeni funksiyalar əlavə olacaq.
Digər insayder Con Prosser həmçinin Samsung Unpacked tədbirinin 10 Avqust tarixində keçiriləcəyini təsdiq edib. İnsayder əlavə olaraq qeyd edib ki, qatlana bilən Galaxy Fold modelləri 26 avqust tarixində satışa çıxacaq. İndi isə yalnız Samsung şirkəti tərəfindən rəsmi təsdiq gözləmək qalır.
Yeni Ağıllı saat modeli olacaq ?
Yeni Galaxy Flip və Galaxy Fold modelləri ilə bərabər Samsung Unpacked tədbirində Galaxy Watch 5 ağıllı saat təqdim ediləcəyi gözlənilir. Galaxy Watch 5 modeli iki versiyada olacaq baza və Pro. Baza versiyanın dizaynı daha sadə və idman stilindədir. İki ölçüdə olacağı haqqında məlumat verilib. Ölçülər 44 mm və daha kompakt şəkildə nəzərdə tutulur. Hər iki model fiziki düymələr ilə təmin olunacaq. Həçinin 4G LTE, GPS və 5 ATM (50 metr dərinlik) dəstəkləyəcək.
Proqram təminatları üçün Google WearOS 3.5 əməliyyat sistemi ilə One UI Watch 4.5 interfeysi istifadə olunacaq. Öncəki model ilə müqayisədə yeni Galaxy Watch 5 modelləri 10 Vt şarj dəstəkləyəcək.
