Samsung tezliklə Galaxy S24 istifadəçilərinə fövqəladə hallarda peyk bağlantısı vasitəsilə mesaj göndərmək imkanı təklif edə bilər. Belə ki, Samsung hazırda bir sıra smartfon modellərində artıq uzun müddətdir ki, gözlənilən peyk mesajlaşmasını sınaqdan keçirir. ABŞ-da bəzi Galaxy S24+, Galaxy S24 Ultra və Galaxy Z Fold 6 istifadəçiləri telefonlarında peyk əsaslı mesajlaşma xüsusiyyətini görməyə başladıqlarını bildiriblər. “Peyk Şəbəkələri” adlı yeni funksiya hazırda yalnız T-Mobile fakturalı xətt istifadəçiləri üçün əlçatandır.
Peyk əsaslı mesajlaşma funksiyası artıq T-Mobile Starlink xidmətini sınaqdan keçirmək üçün müraciət edən istifadəçilər üçün əlçatandır. Xidmət Starlink texnologiyası və aşağı orbit (LEO) peykləri bürcündən istifadə edərək hər yerdə mobil telefon əlaqəsini təmin etmək məqsədi daşıyır. Bu xidmət 2022-ci ilin avqustunda elan edilib, lakin indi beta versiyada mövcuddur. Fövqəladə hallar üçün peyk bağlantısı vasitəsilə mesajlaşma funksiyası əvvəlcə Parametrlər daha sonra qoşulmalar və peyk şəbəkələri hissələrinə keçid etməklə aktiv edilə bilir.
İstifadəçiyə xəbərdarlıq edilir ki, telefonun peyk sistemi vasitəsilə mətn mesajları göndərməsi və qəbul etməsi həmişəkindən daha uzun çəkə bilər. Həmçinin hava şəraitinin (məsələn, buludlu hava şəraiti) və müəyyən strukturların peyk əlaqəsinə təsir göstərə biləcəyi bildirilir. Bu xüsusiyyət texniki olaraq LTE bağlantısı olan bütün telefonlarla işləməlidir. Bununla belə, T-Mobile və Starlink hazırda yalnız bəzi telefonları dəstəkləyir. Samsung-un telefonları da bu siyahıya daxil edilib. İstifadəçilər peyk şəbəkələri seçiminin dekabr 2024 təhlükəsizlik yeniləməsini quraşdırdıqdan sonra ortaya çıxdığını iddia edirlər. Peyk vasitəsilə mesajlaşma, xüsusən də təbii fəlakətlərdə həyat qurtaran xüsusiyyət olsa da, ölkəmizdə də daxil olmaqla, müəyyən regionlarda istifadə etmək mümkün deyil.
