Daha əvvəl haqqında məlumatlar sızdırılan yeni Galaxy A seriyasından olan smartfonlar təqdim olunub. Belə ki, Cənubi Koreyalı texnologiya nəhəngi Samsung, rəsmi olaraq Galaxy A55 və Galaxy A35 modellərini təqdim edib. Ümumiyyətlə, yeni Galaxy A55 və A35 modelləri brendin indiyə qədərki ən gözəl dizaynlı və flaqman hissi verən orta səviyyəyi cihazları hesab olunur. Ötən gecə baş verən təqdim tədbirində yeni cihazların qiyməti və xüsusiyyətləri texnologiya həvəskarlarına bildirilib.
Samsung Galaxy A55 hansı xüsusiyyətlərə malikdir?
Gəlin ilk öncə orta səviyyəsi yeni Galaxy A seriyasının daha performanslı və daha baha təklif olunan modelindən başlayaq. Samsung Galaxy A55 modeli dizayn tərəfində daha əvvəl sızdırıldığı kimi, metal və şüşədən hazırlanmış korpusa malikdir. Qeyd edək ki, bu cihaz metal çərçivəyə malik ilk Galaxy A seriyalı smartfondur. Smartfon 6.6 düymlük FHD+ təsvir ölçülü, 1000 nit parlaqlığa və 120Hz yeniləmə tezliyinə malik Super Amoled ekran panelinə sahib olub. Gorilla Glass Victus tərəfindən qorunan ekranda Vision Booster funksiyası da var.
O cümlədən, Samsung Galaxy A35 modelindən fərqli olaraq Galaxy A55 öz gücünü Exynos 1480 çipsetindən alır. Hansı ki, bu çipsetə RDNA 2 arxitekturasından istifadə edən Samsung-un Xclipse 530 GPU-su daxildir. Xatırladaq ki, ötən günlərdə smartfon performans testindən keçirilmişdi. Hətta o, icmal videosunda smartfon Geekbench testində 1161 tək nüvəli və 3398 çoxnüvəli xal almış. AnTuTu testində isə 713,993 bal toplamışdı. Smartfonun bir digər yeniliyi isə Galaxy A seriyasında ilk dəfə 12GB RAM seçimi təklif etməsidir.
Android 14 əsaslı OneUI 6.1 ilə gələn telefon üçün Samsung dörd əsas Android əməliyyat sistemi yeniləməsini və beş illik təhlükəsizlik yeniləməsini təmin edəcək. Kamera tərəfində isə, yeni A55 OIS funksiyalı f/1.8 50MP əsas, f/2.2 12MP ultra geniş bucaqlı və f/2.4 5MP makro kamera sensorlarına sahib olub. Ön tərəfdə isə 50MP selfie kamerası yer alır. Exynos 1480 prosessorunda olan qabaqcıl AI ISP ilk dəfə Galaxy A seriyalı smartfona zəif işıqda daha keyfiyyətli şəkillər çəkməyə imkan verir. Batareya tərəfində isə cihaz 25Vt sürətli şarj dəstəkli 5000 mAs batareya həcminə sahib olub. Qeyd edək ki, 6-128GB və 8-256GB seçimlərinə sahib olan smartfon müvafiq olaraq 480 və 530 avro qiymət etiketinə sahibdir.
Galaxy A35 hansı xüsusiyyətlərə malikdir?
Galaxy A35 modeli də, müasir dizayna və kamera təkmilləşdirmələrinə sahib olub. Belə ki, daha sürətli prosessor və daha parlaq ekrana sahib olan smartfon One UI 6.1 proqramı ilə gələn ilk orta səviyyəli smartfon modelidir. Galaxy A35 daha müasir görünüşlü dizayna malik olsa da, yenə də plastik çərçivədən istifadə edir. Ekran Gorilla Glass Victus+ ilə qorunur, arxa hissəsi isə şüşədir. Həmçinin smartfon “Key Island” dizaynına sahibdir. Smartfon 6.6 düymlük Full HD+ təsvir ölçülü, 120 Hz yeniləmə tezliyi və 1000 nit parlaqlığı olan Super AMOLED ekran ilə təchiz edilib. Bu model həmçinin optik barmaq izi oxuyucusu, stereo dinamik və IP67 sertifikatına malikdir.
Öz gücünü Samsung Exynos 1380 çipsetində alan cihaz 209 qram ağırlığa sahibdir. Kamera tərəfində isə smartfon OIS funksiyalı f/1.8 50MP əsas, f/2.2 8MP ultra geniş bucaqlı, f/2.4 5MP makro kamera sensorlarına sahibdir. O cümlədən smartfon 13 MP selfie kamerasına sahib olub. Qeyd edək ki, smartfon 4K 30FPS video qeyd edə bilir. Həmçinin, texnologiya nəhəngi bildirir ki, VDIS video stabilizasiyasını, Super HDR Video isə rəngləri və dinamik diapazonu yaxşılaşdırır. Smartfon 4 rəngdə Buz mavisi, lavanda, limon sarısı və sürməyi olaraq təklif olunacaq. Həmçinin Samsung Galaxy A55 və A35 batareya tərəfində eyni xüsusiyyətlərə malikdir. Qiymət tərəfində isə 6-128GB və 8-256GB yaddaş seçimləri ilə təklif edilən smartfon 379 avro və 449 avro qiymət etiketinə sahib olub.
