Xiaomi bu gün Çində Redmi Note 14 seriyası üçün təqdimat tədbiri təşkil edib. Seriyanın giriş səviyyəli modeli olan Redmi Note 14 5G, sələfi ilə müqayisədə əhəmiyyətli təkmilləşdirmələrlə gəlir. Seriyaya həmçinin Redmi Note 14 Pro və Pro+ modelləri də aiddir.
İlk öncə qeyd edək ki, Redmi Note 14 5G, FHD+ həlli və 120 Hz yeniləmə tezliyi ilə 6,67 düymlük OLED displeylə gəlir. Ekranın ən yüksək parlaqlıq səviyyəsi sələfi ilə müqayisədə inkişaf edərək 2100 nita qədər artırılıb. Gorilla Glass 5 ilə qorunan ekranın altına barmaq izi oxuyucusu da əlavə edilib. İkili kamera quruluşuna malik Redmi Note 14 5G-nin əsas kamerası OIS dəstəyi ilə 50MP Sony LYT-600 sensorundan istifadə edir. Maraqlısı budur ki, sələfi Note 13 5G-nin 108 meqapiksellik əsas kamerası ilə müqayisədə daha aşağı təsvir ölçülü sensora üstünlük verilib. Əsas kamera 2MP-lik ikinci sensor ilə dəstəklənir. Ön tərəfdə isə bizi 16MP selfie kamerası qarşılayır.
Performans baxımından Redmi Note 14 5G, Mediatek-in Dimensity 7050 Ultra çipseti ilə sələfindən daha üstün performans göstərə bilir. Bu çipset 12 GB-a qədər RAM və 256 GB yaddaşla müşayiət olunur. Smartfon həmçinin 45 Vt sürətli şarj dəstəyi ilə 5110 mAh batareya həcminə sahib olub. Proqram təminatı tərəfində o, HyperOS əsaslı Android 14 ilə gəlir. Çində Redmi Note 14 qiymətləri isə aşağıdakı kimidir:
- 6+128 GB: 156 dollar
- 8+128 GB: 171 dollar
- 8+256 GB: 200 dollar
- 12+256 GB: 228 dollar
Redmi Note 14 Pro və Pro+ nələr təklif edir?
Çində keçirilən təqdimat tədbirində Redmi Note 14 seriyası çərçivəsində bizlərə təqdim edilən digər smartfonlar da Redmi Note 14 Pro və Pro+ modelləri olub. Smartfonlarda ilkin nəzərə çarpan dəyişiklik kamera bölməsinin yeri olub. Belə ki, kamera bölməsi indi smartfonun ortasında quraşdırılıb və incə profilə malikdir.
Redmi Note 14 Pro seriyası 6,67 düymlük əyri AMOLED ekrana malikdir. Ekran 1,5K təsvir ölçüsü, 120 Hz təzələmə tezliyi və 3000 nit parlaqlıq təmin edir. Bundan əlavə, smartfonlar ekran tərəfində ekran barmaq izi oxuyucusu və DR10+ və Dolby Vision kimi xüsusiyyətləri də dəstəkləyir. Kamera tərəfində, Redmi Note 14 Pro və 14 Pro Plus üçlü arxa kamera quraşdırması ilə gəlir. Note 14 Pro Plus modelində sələflərində olduğu kimi 200MP deyil, 50MP əsas kamera sensoru yer alır. 60 mm fokus uzunluğuna və 2,5x optik böyütmə qabiliyyətinə malik 50 MP telefoto kamera və 8 MP ultra geniş bucaqlı obyektiv var.
Redmi Note 14 Pro Snapdragon 7s Gen 3 prosessoru ilə birlikdə gəlir, lakin Redmi Note 14 Pro+ Dimensity 7300 Ultra ilə təchiz edilib. Pro Plus modeli 90 Vt sürətli şarj dəstəkləyən 6200 mAh batareya həcminə sahib olarkən, sadə Pro modeli 45 Vt şarj dəstəkli 5500 mAh batareya həcminə sahib olub. Proqram təminatı baxımından cihazlar HyperOS əsaslı Android 14 ilə gəlir. Redmi Note 14 Pro və Pro+ Midnight Black və Mirror Porcelain White rənglərində gəlir. Habelə, Redmi Note 14 Pro-nun başlanğıc qiyməti 199 dollardır. Note 14 Pro Plus 270 dollardan başlayaraq satışa çıxarılacaq.
