Redmi Note seriyasının dizaynını premium cihazlara bənzətməyi və keyfiyyət baxımından daha yüksək səviyyəyə çıxarmağı özünə şərt qoymuş kimi görünür. Daha əvvəl eyni xəbərlər Redmi Note 12 seriyası barədə çıxmışdı. Lakin daha sonra öz təsdiqini tapmadı. İndi isə tanınmış insayderlər tərəfindən birbaşa eskizlər üzərindən Redmi Note 13 Pro modelinin dizaynı yayımlanıb. Qəribəliklər isə eskiz üzərindən insayderlərn etdiyi şərhlər zamanı ortaya çıxır.
Belə ki, Xiaomi 13 ilə vizual olaraq bənzərlik daşıyan smartfonun ekran çərçivələri olduqca nazik hazırlanacaq. Hətta ekran çərçivələrini şirkət o qədər azaltmağı planlaşdırır ki, Xiaomi 14 modelindən belə daha nazik çərçivələrdən söhbət gedir. Bəli, məhz orta-üst seqmentdə Redmi Note 13 Pro modeli şirkətin bu il təqdim edəcəyi flaqman modellərindən belə daha nazik ekran çərçivələrinə sahib olacaq.
Texniki cəhətdən 200MP əsas kameradan əlavə ümumilikdə üçlü kamera konfiqurasiyası, 120Hz OLED ekran işlədiləcək cihaz MIUI 15 interfeysi ilə təchiz edilmiş ilk cihaz kimi gözlənilir. İstifadə ediləcək çipset barədə isə məlumat verilmir. Böyük bir ehtimalla performans baxımından çox ciddi bir yüksəltmə görmədən Dimensity 1080 çipsetindən cüzi güclü Dimensity 6000 və ya 7000 seriyası çipsetlər qarşımıza çıxa bilər. Ehtimallar Dimensity 7050 və Dimensity 7200 çipsetlərindən yana özünü göstərir. Böyük bir ehtimalla “Pro+” modeli ilə sadə “Pro” modeli arasında bu çipsetlər dəyişəcəkdir. Batareya baxımından isə 6000 mAs-a yüksəltmə və 120 vatt sürətli şarj ilə davam edilməsi planlaşdırılır.
