Realme firması hələ də üst seqment premium smartfonlar istehsal etmir. Üst seqment premium smartfonlar dedikdə, çox güclü kamera parametrləri boydan-boya əyrilərə sahib bahalı ekran panelləri və.s nəzərdə tutulur. Bu xüsusiyyətlər qiyməti xeyli artırır. Ona görə də Realme firması yenə üst seqment üçün nəzərdə tutulmuş rəqabətcil, nisbətən “budanmış” smartfonlar hazırlamağa üstünlük verir. Elə yaxınlaşmaqda olan Realme GT 2 Master Explorer Edition modeli də tam olaraq bu prinsipə uyğun olaraq hazırlanıb. Üst seqment üçün ən güclü çipset, nazik çərçivəli ekran paneli və işlərinizi kifayət qədər görə biləcək kameralar ilə bu model bir çoxlarınızın seçimi ola bilər.
GT 2 Master Explorer Edition modeli sadə və bir o qədər yaraşıqlı dizaynı ilə fərqlənir!
Realme firmasının bu modeli adətən Galaxy S22+ modelini xatırladan minimium qalınlıqlı və demək olar simmetrik çərçivələrə malik AMOLED ekran paneli alıb. 6,7 düymlük nəhəng ekranın gövdə nisbəti 94,2% təşkil edir ki, filmlərə və.s baxmağı sevən insanlar üçün əla seçim olacaq. Lakin mərkəzdəki selfi kamerası həddindən artıq böyük görünür. Bir tərəfdən sevinə bilərsiniz ki, Realme selfi kamerasını gücləndirib, amma ekranın ortasında böyük bir qara dəlik biraz narahatçılıq yarada bilər.
Smartfon LPDDR5X operativ yaddaşa sahib ilk model olacaq!
Nəhəng ölçüsü ilə 8.2mm qalınlıqlı və sadəcə 195 qram olan GT 2 Master Explorer modeli dünyada ilk LPDDR5X texnologiyasını alan smartfon hesab edilir. Hal-hazırda bazardakı LPDDR5 operativ yaddaş həllərindən 1,3 qat daha yüksək performansa sahib bu texnologiya 20% daha az enerji sərf edir. Smartfonun öz gücünü Snapdragon 8+ Gen 1 çipsetindən aldığını da qeyd etməliyik.
Bu qədər güclü çipsetə və nəhəng ekrana sahib smartfonun enerjisinin tez bitəcəyini düşünürsünüzsə narahat olmağa dəyməz. Realme tam olaraq 5000 mAs tutuma malik batareya işlədib və 100 Vt sürətli doldurma ilə boş batareyanı 100%-ə qədər sadəcə 25 dəqiqəyə doldura bilərsiniz.
Smartfonun arxa tərəfində kənardan baxdıqda Realme firmasına aid kamera modulunu rahatlıqla müşayiət etmək olur. Sol üstdə 2 ədəd 50MP və 1 ədəd 2MP kamera sensorları işlədilib. Böyük bir ehtimalla IMX766 olan baş sensor OIS stabilizatoru ilə də gücləndirilib. Realme GT 2 Master Explorer Edition modeli barədə hələlik verəcəyimiz məlumatlar bundan ibarətdir. Smartfonun qiyməti və texniki xüsusiyyətləri barədə daha dərin detallar 12 iyulda keçiriləcək təqdimatdan sonra məlum olacaq.
