Realme Hindistan bazarında növbəti C seriyalı smartfonunu təqdim etməyə hazırlaşır. Bir neçə gün əvvəl Realme şirkətinin vitse-prezidenti Madhav Sheth Twitter tətbiqində növbəti C seriyası ilə bağlı sorğu keçirdi və yeni Realme C seriyası cihazlarının satışa çıxarılacağını təsdiqlədi. Ötən gün Madhav Sheth Twitter hesabından növbəti C seriyası smartfonla bağlı bir yazı paylaşıb və Realme Mini kapsul (Mini Capsule) xüsusiyyətinin yeni Realme C seriyası cihazlarına gələcəyini təsdiq edib. Smartfon barədə detallar rəsmiləşməsə də, iPhone 14 Pro modelində gördüyümüz Dinamik Ada bənzəri interaktiv hissəyə sahib olacaq. O, bunu təsdiq edən şəkil də paylaşıb.
Dərc edilmiş şəkil şirkətin Mini Kapsul (Mini Capsule) adlandırdığı interaktiv həllini nümayiş etdirir. Şəkildə Mini Kapsulun istifadəçiyə smartfonun doldurulma vəziyyəti haqqında necə məlumat verdiyini görürük. Realme Mini kapsul ekranın yuxarı hissəsində ön kameranın yerləşdiyi yerdə quraşdırılır.
Post daha sonra Madhav Sheth tərəfindən silinsə də, xəbərin ekran şəkli artıq internetə yayılıb. Verilən məlumata görə, Mini Kapsullu ilk Realme modeli böyük bir ehtimalla elə Realme C55 olacaq və yenilik digər modellərə də yayılmağa başlayacaq.
İndiki vəziyyətdə Realme modelində olacaq Mini Kapsul Apple şirkətinin Dynamic Island kimi funksional olacaq və ya olmayacaq deyə bilmərik. Şirkət həmçinin üçüncü tərəf proqram tərtibatçılarını bu funksiyanı dəstəkləməyə inandırmalıdır. Maraqlı detalları yeni C seriyası modeli çıxanda öyrənəcəyik.
Digər tərəfdən, internetdə Realme C33 (2023) və Realme C55 modelləri göründü. Smartfonlara gəldikdə isə, Appuals resursunun məlumatına görə bu da Hindistan bazarı üçün növbəti C seriyalı telefonlar kimi nəzərdə tutulub. Nəticədə, şirkət Realme C33-ü (2023) 2022-ci ilin sentyabrında buraxılmış orijinal Realme C33-ün təkmilləşdirilmiş versiyası kimi təqdim etməyi planlaşdırır. Hazırda Realme C33-ün (2023) texniki xüsusiyyətləri haqqında məlumat yoxdur. Xatırladaq ki, əvvəlki Realme C33 6,5 düymlük HD+ ekran, 5 MP ön kamera, 50 MP ikili arxa kamera və Unisoc T612 çipseti və 5000 mAh batareya ilə təchiz edilmişdi.
