Xiaomi alt brendi olan POCO bu gün yay ayının son tədbirini nəhayət keçirdi. Redmi tərəfindən bir neçə ay əvvəl çıxarılmış Redmi K50 və Redmi Note 11 seriyasından gələn təkrar brendləşdirilmiş cihazlar təqdim edildi. Hansı ki, söhbət POCO F4 və POCO X4 GT modellərindən gedir. Smartfonlar bir-birindən fərqli məqsədlərə, texniki xüsusiyyətlərə və dizayn elementlərinə sahibdirlər.
POCO X4 GT modeli sizə nə təklif edir?
POCO X4 GT modeli Note 11T Pro modelinin təkrar brendləşdirilmiş versiyasıdır. May ayında Çin bazarı üçün keçirilmiş təqdimat zamanı paylaşdığımız xəbərdəki detallarda yazdığımız məlumatların hər biri POCO X4 GT üçün birə-bir uyğun olacaq.
Smartfonun elə bir spesifik dizaynı yoxdur. Yumuşaq kənarlı plastik gövdəyə sahibdir. Sol üst tərəfdə sadə bir kamera modulu yerləşdirilib. Kamera modulundan kənara doğru da əlavə olaraq 2 ədəd fərqli obyektiv çıxıntısı yaranıb.
Smartfon öz gücünü Dimensity 8100 çipsetindən alır. Snapdragon 870 və Snapdragon 888 çipsetləri arasında yerləşdirə biləcəyimiz Dimensity 8100 çipseti performans davamlılığına görə Snapdragon 8 Gen 1 seriyasına belə meydan oxuyacaq qədər güclüdür. Daha ətraflı məqalənin sonuna yerləşdirdiyimiz keçiddən Dimensity 8100 analizi ilə bağlı məqaləyə nəzər yetirə bilərsiniz. POCO X4 GT, LPDDR 5 operativ yaddaşa və UFS 3.1 yaddaş texnologiyasına sahibdir. LiquidCool Technology 2.0 soyutma sistemi quraşdırılıb və POCO X3 GT ilə müqayisədə 32% daha böyükdür. 7 qatlı qrafit soyutma sistemi ilə təchiz edilib.
6.6 düym ölçülü 144Hz tezlikli, FHD+ təsvir ölçülü IPS LCD ekran panelli smartfonun ekranı Corning Gorilla Glass 5 ilə qorunur. 270Hz sensor tezliyinə sahibdir. Nisbətən ucuz qiymətə yüksək performanslı cihaz axtaranlar üçün çıxarıldığından bu modeldə IPS LCD ekran paneli işlədilib. Bu panel True Display, Dolby Vision, True Color, DC Dimming, HDR 10 kimi lazımi keyfiyyət standartlarının bir çoxuna malikdir.
Arxa tərəfdə sensor detalları verilməyən 64MP F/1.89 əsas, 120° baxış bucağına sahib 8MP F/2.2 ultra-geniş, 2MP F/2.2 makro sensorları işlədilib. Əsas sensor böyük bir ehtimalla ISOCELL GW1 64MP sensorudur. Hansı ki, Note 11T Pro modelində işlədilmişdi.
POCO X4 GT modeli 5080mAh həcmli 67W doldurma dəstəkləyən batareyaya sahibdir. Cihazda Hi-Res Audio sertifikatlı və Dolby Atmos dəstəkləyən həqiqi simmetrik səs ucaldanlar mövcuddur. 5G, Wi-Fi 6, Bluetooth 5.3, NFC, 3.5mm qulaqlıq girişi və.s vardır. POCO X3 Pro ilə müqayisədə demək olar hər cəhətdən güclüdür.
POCO X4 GT qiyməti:
- 8-128GB 380€ (İlkin sifarişlə 300€)
- 8-256GB 430€ (Ilkin sifarişlə 350€)
Qeyd: Təqdimatda qiymətlər avro ilə qeyd olunsa da satışı çox vaxt rəqəmlər sabit qalmaqla dollar üzərindən həyata keçirilir. Eyni zamanda ilkin sifariş qiyməti demək olar elə yekun qiyməti ifadə edir. Yəni kobud formada smartfonun 300$ olduğunu düşünə bilərsiniz.
POCO F4 modeli sizə nə təklif edir?
POCO F4 modeli də əslində Redmi K50 seriyası ilə bir yerdə çıxmış Redmi K40s modelinin modifikasiya dəyişikliyi edilmiş halıdır. Gövdə kənarları POCO X4 GT ilə müqayisədə kəskin dizayna malikdir. Sol üst hissəyə yerləşdirilmiş geniş, düzbucaqlı kamera adası daxilində çevrə çəkilərək kamera sensorları üçbucaq formasında modula yerləşdirilib.
Smartfona 6.67 düym ölçülü E4 AMOLED ekran paneli quraşdırılıb. FHD+ təsvir ölçülü, 120Hz yeniləmə tezliyinə sahib ekran Corning Gorilla Glass 5 vasitəsilə zərbələrdən qorunur. P3 rəng qamutu, Dolby Vision, HDR10+ kimi keyfiyyət standartları ekran paneli üçün də keçərlidir. Əslinə qalsa bu ekran paneli POCO F3 modelindəki ilə deyəsən birə-bir eynidir. Sadəcə cüzi təkmilləşdirmələr ola bilər.
Smartfon Snapdragon 870 çipseti ilə təchiz edilib. LPDDR 5 və UFS 3.1 yaddaş texnologiyalarına sahibdir.
Smartfonun POCO F3 ilə fərqləri arasında əsas əlamətdar dəyişiklik özünü kamera cəhətdən göstərir. Yenə istehsalçısı naməlum olan 64MP F/1.79 təsvir ölçülü kamera sensorunun bu cihaza quraşdırıldığı bildirilir. Lakin POCO brendində ilk dəfə OIS texnologiyası bu smartfonda istifadə edilib. Üstəlik POCO F4 modeli 4K keyfiyyətdə 60FPS video qeydlər etməyi bacarır. Digər 2 kamera sensoru isə 119° baxış bucağına sahib 8MP ultra-geniş və 2MP makro olmaqdadır. Qeyd edək ki, hər iki cihazda klassik 20MP selfi kamerası işlədilib.
POCO F4 modelində 4500mAh həcmli 67W sürətli doldurma dəstəkləyən batareya mövcuddur. DolbyAtmos dəstəkli həqiqi simmetrik səs ucaldanlar quraşdırılıb.
POCO F4 GT qiyməti:
- 8-128GB 400€ (İlkin sifarişlə 350€)
- 8-256GB 450€ (Ilkin sifarişlə 400€)
