Çinin ən böyük texnoloji şirkətlərindən biri olan OPPO, bu gün MariSilicon çipset seriyasının istehsalını dayandırdığını bildirib. Qeyd edək ki, texnologiya nəhəngi hal-hazırda bazarda olan yüksək keyfiyyətli smartfonlarında öz istehsalı olan MariSilicon X və MariSilicon Y çiplərindən istifadə edir. Hansı ki, bu çiplər müvafiq olaraq kamera və bluetooth üçün istifadə olunur. Xatırladaq ki, şirkət öz çiplərini istehsal etmək üçün çox böyük investisiyalar etmişdi. Lakin bu gün, şirkət açıqladı ki, MariSilicon çipləri artıq istehsal olunmayacaq.
OPPO şirkəti bildirib ki, şirkət qlobal iqtisadi vəziyyət və smartfon sahəsindəki qeyri-müəyyənlik səbəbindən uzunmüddətli inkişaf planlarında düzəliş etməli olub. Belə ki, texnoloji şirkət xüsusi çiplərindən məsul olan ZEKU-nu bağladığını bildirib. Lakin OPPO bildirib ki, yeni qərar hal-hazırda bazarda mövcud olan MariSilicon çipləri ilə təchiz edilən cihazlara təsir etməyəcək. Yeni MariSilicon çiplərinin isə yaxın gələcəkdə istehsal edilməyəcəyini bildirib. Əlavə olaraq isə OPPO şirkəti yenə də gələcəkdə ilk prosessorunu istehsal etməyi planlayır. Lakin bu qərar həmin prosessorun inkişafına heç də yaxşı təsir bağışlamır. Buna baxmayaraq şirkət ilk prosessorunu 2024-cü ildə təqdim edəcəyi gözləbilir. Hətta prosessorun dizaynının tamamlandığı və sınaq mərhələsində olduğu bildirilir.
Xatırladaq ki, OPPO şirkəti MariSilicon X çipinə çox güvəndiyini bildirirdi. Hətta texnologiya nəhəngi öz çipini Find və Reno smartfon seriyasında istifadə etmişdi. Belə ki, bu çiplər süni intellekt ilə təsvirlərin yenidən işlənməsinə və daha yaxşı keyfiyyətdə görünməsinə kömək edirdi. Həmçinin MariSilicon X çipi 4K HDR videoları belə dəstəkləyirdi. Hətta bu çiplər Find X6 Pro modelində öz performansını artıqlaması ilə göstərmişdi. Əslində bu qərar şirkətin tamamilə yeni və ilk prosessorunun hazırlanması ilə əlaqəli bəzi düzəlişlər etməsindən qaynaqlana bilər. Belə ki, şirkətin rəqibləri olan Vivo və Xiaomi də öz prosessorunu hazırlamağa çalışır. Məhz bununla bağlı olaraq OPPO yeni prosessoruna daha çox diqqət və vəsait ayırmaq istəyir.
