Bildiyimiz kimi, Çin gün keçdikcə texnologiya sahəsində ilkləri reallaşdırır. Belə ki, ötən günlərdə Çində China Mobile 5G-Advanced və ya 5.5G bağlantısını işə salıb. Beləliklə, çində Oppo Find X7 seriyası 5.5G dəstəyi təklif edən ilk smartfonlar olacaq. Yeni 5.5G kommersiya təqdimatından sonra Oppo şirkətinin məhsul direkotoru da bununla bağlı paylaşım edib.
Çin texnologiya sahəsində yenə bir ilkə imza atır. Oppo brendinin məhsul direktoru Pele Lau, 5.5G bağlantısının kommersiya təqdimatından dərhal sonra Oppo Find X7 Ultra smartfonunun üzərində 5.5G yazan şəkil paylaşıb. Həmçinin, Weibo-da Oppo Find X7-nin də 5.5G bağlantısı ilə yenilənəcəyini göstərən bir yazı var. Hər iki smartfonun fərqli çipsetlərə sahib olduğunu bildiyimiz üçün maraqlı bir vəziyyət yaranıb. Qeyd edək ki, Oppo Find X7 Dimensity 9300, X7 Ultra isə Snapdragon 8 Gen 3 çipseti ilə təchiz edilib.
Beləliklə, Find X7 seriyası 5.5G dəstəkləyən ilk smartfonlar olacaq. Bundan əlavə, il ərzində 5.5G dəstəkləyən smartfonların sayının 20-ni keçəcəyi gözlənilir. Hətta, China Mobile bu ilin sonuna kimi 300-dən çox şəhəri əhatə edən yeni şəbəkəni işə salmağı planlaşdırır. Qeyd edək ki, 5G-Advanced mobil telekommunikasiya standartlarını təyin edən 3GPP-nin 18-ci 3GPP versiyasının marketinq adıdır. 5G ilə müqayisədə 300%-ə qədər yüksək məlumat ötürmə sürəti təklif edən standart nəzəri olaraq 10 Gbps-ə qədər yükləmə sürəti və 1 Gbps-ə qədər ötürmə sürəti təklif edə bilər.
