Ötən gün anons etdiyimiz kimi smartfonları ilə diqqət çəkməsi gözlənilən növbəti brend MWC 23 sərgisi timsalında OnePlus olacaqdı. Bir müddət əvvəl baş tutan təqdimat tədbirində OnePlus brendi özünün OnePlus 11 Concept Phone adlandırdığı smartfonu təqdim etdi. Smartfon əslində texniki baxımdan OnePlus 11 sadə modeli üzərində bəzi təkmilləşdirmələrə sahibdir. Lakin bu təkmilləşdirmələr özünü yalnız performans tərəfindən göstərmək üçün nəzərdə tutulub. Bəziləriniz bəlkə də daha mükəmməl kameralar və.s gözləyirdinizsə, bunların heç birini görə bilməyəcəksiniz.
Çünki, OnePlus şirkəti Concept modeli ilə birbaşa soyutma sistemini necə təkmilləşdirə bilərik mövzusuna fokuslanıb. Active CryoFlux adı verilmiş texnologiya kompüterlərdəki maye soyutma sisteminə bənzər, lakin onun kiçildilmiş versiyası kimi çıxış edir. Arxa tərəfdəki mavi işıqlandırılmış kanallar əslində soyutma sisteminin kanallarıdır. Konseptdə bunu vizual nümayiş etdirmək istəyən şirkət soyutma sisteminə maksimum dərəcədə arxa qapağa yaxın dizayn edib.
Smartfon daxilində 0.2 cm² həcmli bir mühərrik və ya “pompa” mövcuddur. Bu mühərrik mayenin daim bu kanallarda dövr edilməsini təmin edir. Hətta arxa qapağa yaxından baxdıqda siz bu kanallardan mayenin dövrünü vizual olaraq görə bilirsiniz. OnePlus 11 Concept Phone modelində bu kanallar Active Cryoflux texnologiyasının gücü hesabına iddialara görə, sistem temperaturunu 2,1°C azalda bilir. Bu da oyunlarda təqribi 3-4FPS avantaj verir. Şarj müddəti isə təqribi 30-45 saniyə azala bilir ki, temperatur düşüşü 1.6°C səviyyələrində şirkətin dediyinə görə müşahidə olunur.
Kameranın ətrafında kı mavi halqa isə sadəcə işıqlandırmadır. Heç bir funksionallığa malik deyil. Smartfonda isə başqa bir texniki dəyişiklik müşahidə edilmir və ya açıqlanmır. Sadəcə dizayn baxımından OnePlus 11 Concept modelinin kamera modulu ətrafında bəzi kiçik toxunuşlar edilib. Smartfonun seriya istehsalına da göndərilməyəcəyini nəzərə alsaq, bəlkə də gələcəkdə bu texnologiyanın nə vaxtsa işlədiləcəyini təxmin etməkdən başqa seçim qalmır.
