2020-ci ildə təqdim edilən M1 prosessoru ilə birlikdə Apple mühəndisliyinin nə qədər güclü olduğunu bir daha anlamış olduq. O vaxta qədər şirkətin istifadə etdiyi İntel seriyası prosessorlar güclü olsa da yetərincə effektiv nəticə göstərmirdi. M1 seriyasından etibarən performansın daha da artmasından əlavə xüsusilə enerji sərfiyyatı cəhətdən Mac modelləri xeyli irəliləyiş əldə etdi. Digər bir tərəfdən Apple “M”seriyası prosessorlar Apple ekosisteminin təkmilləşdirilməsi üçün də əhəmiyyətli rol oynadı. Ötən ay təqdim edilmiş M2 prosessoru da M1 seriyasının davamı olaraq çox güclü idi. M2 kimi güclü performansa sahib prosessora sahib kompüterin isə ilk növbədə güclü soyutma sistemi ilə təchiz edilməsi lazımdır. Lakin deyəsən Apple şirkəti bəzi şeyləri yetərincə nəzərə almayıb. 8K Canon RAW formatında render alan Max Tech ləqəbli YouTuber, MacBook Pro modelinin yüksək limitlərə dözümlü olmadığı qənaətinə gəlib.
108 dərəcəyə qədər isinən MacBook Pro böyük performans itkisi yaşayıb
Edilə biləcək ən ağır testlərdən biri yoxlayan Max Tech, yeni M2 prosessorlu MacBook Pro modelində 8K RAW görüntüləri render etməyə çalışıb. Normal bir istifadəçininin tez-tez etməyəcəyi bir şey olsa da limitləri yoxlamaq istəyən YouTuber gözlənilməz çətinliklərlə qarşılaşıb.
Test müddətində 13 düymlük MacBook Pro modelindəki M2 prosessoru 108 dərəcə temperatura qədər isinib. Nəticədə prosessorun P-Core və E-Core olaraq adlandırılmış nüvələrinin tezliyi 2228Mhz-dən 1444MHz-ə qədər azalıb. Uyğun olaraq 29.46 Vatt olan enerji sərfiyyatı da 7.31 vatta qədər düşüb. Qrafik çipinin performansı isə 1393MHz-dən 289MHz-ə geriləyib. Prosessor özünü qorumaq üçün gücünü maksimum azaldıb və 84 dərəcəyə soyuyana kimi performansını bərpa etməyib. Bu test vasitəsilə əmin olduğumuz tək şey bu cür güclü prosessor üçün tək pərli sistemin kifayət qədər yetərli olmadığıdır. Üstəlik bu pər test boyunca dayanmadan 7200RPM-lik maksimum sürətlə işləyib.
Doğrudur, Max Tech ləqəbli Vadim Yuryev notbuku çox çətinə salıb. Amma 1300 dollar qiymət etiketinə sahib MacBook Pro modelində görüləcək peşəkar işləri nəzərə aldıqda problemi görməzdən gəlmək doğru olmaz. MacBook Pro modelində ən azından 1 ədəd də olsa pərli soyutma sistemi mövcuddur. Bir müddət sonra sifariş üçün açılacaq MacBook Air modelində isə heç bir pərli soyutma texnologiyasından istifadə edilməyəcək. Alıcılar MacBook Air modelində nisbətən ağır işlər görmək barədə düşünürlürsə tələsməsələr yaxşı olar. Vadim Yuryev tərəfindən paylaşılmış tvitlər və görüntülər ilə aşağıdan tanış ola bilərsiniz.
