Lenovo brendi CES 2024 texnologiya sərgisində həm Windows, həm də Android sistemlərinə sahib ThinkBook Plus Gen 5 Hybrid modelini təqdim edib. İnnovativ hibrid noutbuk istifadəçilərə xüsusi ehtiyacları və istəkləri əsasında hər iki platforma arasında keçid etmək imkanı verir. O cümlədən yeni noutbuk asanlıqla Android sistemli planşetə də çevrilə bilir. İstifadəçilər 14 düymlük 2.8K təsvir ölçülü OLED paneli klaviaturadan ayırarmaq imkanına sahib olub. Hətta klaviatura yenidən ekran paneli ilə birləşdirildikdə cihaz Windows əməliyyat sisteminə keçid edir.
Bu ilin ikinci rübündə bazara çıxarılması gözlənilən Lenovo brendinə məxsus ThinkBook Plus Gen 5 Hybrid noutbukunun başlanğıc qiyməti 2000 dollardır. Məhz cihazın qiymətini bu qədər xüsusi edən onun eyni anda planşet funksiyalarını təmin edən Qualcomm Snapdragon 8 Gen 1 Plus çipseti və Windows əməliyyat sistemini işlədən Intel Core Ultra 7 prosessoruna sahib olmasıdır. Qeyd edək ki, hibrid noutbukun digər texniki göstəriciləri məhz 32 GB ram və 1 TB SSD ilə təchiz edilməsidir. Digər tərəfdən Hybrid Tab planşetində 12GB ram və 256GB yaddaş mövcuddur. Android 13 əməliyyat sisteminə sahib olan bu cihaz 38 Vt batareyası ilə sabit performans təmin edir.
O cümlədən noutbuk Windows 11 əməliyyat sisteminə sahibdir və 75 Vt batareya ilə təchiz edilib. Yəni klavitura çərçivəsi ekrandan ayrıldıqda cihazın batareyası və yaddaşı da müvafiq olaraq ayrılır. Güclü performansı və çox yönlü dizaynı ilə yeni hibrid noutbuk əsl peşəkarların seçimi olacaq. Belə ki, Lenovo eyni anda performans və rahatlıq axtarışında olan istifadəçiləri üçün ikisi birində cihaz hazırlayıb.
