Leica brendi Leitz Phone seriyasının yeni modeli olan Leitz Phone 2 smartfonunu təqdim edib. Leica şirkətinin Leitz Phone seriyasının ilk modeli olan Leitz Phone 1 smartfonu da elə ötən il çıxarılmışdı. Əgər Leica brendini tanımırsınızsa, Alman şirkəti olan Leica 1986-cı ildə fotoaparat istehsalı ilə bazara çıxmışdı. Hətta brendin bir çox məşhur fotoaparatları bazarda hələ də mövcuddur. Brend uzun illər Huawei şirkəti ilə smartfonlardakı kamera texnologiyaları bağlı əməkdaşlıq etsə də, keçən ilin iyul ayından etibarən isə Xiaomi ilə əməkdaşlıq edir. Brendin bu smartfonu SoftBank tərəfdaşlığında istehsal olunub və Yaponiya bazarında satışa çıxarılıb.
Leitz Phone 2 smartfonunun texniki xüsusiyyətləri
Leica tərəfindən istehsal edilmiş Leitz Phone 2 modeli Yaponiya istehsalı daha əvvəl təqdim edilmiş Sharp Aquos R7 modeli əsasında hazırlanıb. Yeni smartfon sələfindən fərqli olaraq yeni rəng seçiminə və yenilənmiş proqram təminatına sahibdir. Qeyd edək ki, brendin ilk modeli yalnız qara rəng ilə təklif olunurdu. Yeni smartfon isə 2 rəng seçimi ilə ağ və qara rənglərdə təklif olunur. Smartfonun maraqlı xüsusiyyətlərindən biri odur ki, smartfonun üzərində Leica brendinin yazısı və ya logosu yoxdur. Onun əvəzinə seriyanın adı olan Leitz logosunu smartfonun arxa hissəsində görə bilərik. Smartfonun gövdəsi isə olduqca köbud görünüşə malikdir.
Brendin yeni smartfonu Snapdragon 8 gen 1 çipseti ilə təchiz olunmuşdur. Ən azından Snapdragon 8+ Gen 1 çipsetinin quraşdırılması gözlənilsə də Leica brendi daha ucuz olması üçün və smartfonun hazırlığına xeyli müddət əvvəl başladığı üçün Snapdragon 8 Gen 1 çipsetindən yana seçim edib. Əlavə olaraq qeyd edək ki, smartfona UFS 3.1 və LPDDR5 yaddaş texnologiyaları da quraşdırılıb. Eyni zamanda yaddaş həcmini əlavə olaraq 1TB-a qədər MicroSD ilə artıra bilərsiniz.
Şirkət bu smartfona 6.6 düymlük IGZO OLED ekran paneli quraşdırıb. 2730×1260 piksel təsvir ölçülü ekranın görüntü yeniləmə tezliyi 240Hz təşkil edir. Uyğun olaraq ekran 1000 nit maksimum parlaqlıq və 10 bit rəng dərinliyi təklif edir. Smartfonun ekranı Dolby Vision texnologiyasını dəstəkləyir və ekran panelinin altında barmaq izi sensoru mövcuddur.
Kamera parametrlərinə gəldikdə isə 1 düymlük 47.2MP əsas və 1.9MP dərinlik sensorlarına sahibdir. Selfi kamerası isə 12.6MP təşkil edir. Onuda qeyd edək ki, smartfonun dərinlik kamerası 1.9MP eyni zamanda portret kamerası kimi də adlandırıla bilir. Leica brendi ötən illərdə Leitz seriyası ilə 1 düymlük kameraya sahib ilk smartfon kimi adını tarixə yazsa da bu Sony şirkətinin 1 düymlük IMX989 sensorunu təqdim etməsi Leitz seriyasının bu üstünlüyünü öldürdü. Artıq bir çox şirkət 1 düymlük kameraya sahib smartfon hazırlayır, o cümlədən Xiaomi 12S Ultra çoxdan satışdadır.
Leica brendinin yeni Leitz Phone 2 modeli 5000 mAs həcmli batareyaya sahib olsa da smartfonun neçə Vatt şarj dəstəklədiyi açıqlanmayıb. Smartfon 3.5 mm qulaqlıq girişi ilə yanaşı bir neçə müasir texnologiya ilə də təchiz olunub. Bunlara Bluetooth 5.2, NFC, Wifi 6 həmçinin müasir 5G internet funksiyaları aiddir. Smartfon USB Type-c ilə şarj olur. Smartfonun qiymətinə gəldikdə isə 12-512GB yaddaşa malik smartfon 1540$ başlanğıc qiyməti ilə təklif olunur və 18 noyabrdan əlçatan olacaq.
