Realme şirkəti bu gün rəsmi olaraq Realme 10 seriyasına start verib. Belə ki, giriş səviyyəsi smartfon olan Realme 10 modeli seriyanın digər modellərindən fərqli olaraq daha tez qarşımıza çıxarılıb. Yəni Realme 10 Pro və Realme 10 Pro+ modelləri bu gün debüt etməyib. Həmin modellərin təqdimatı 17 noyabrda baş tutacaq. Beləliklə, gəlin bu gün təqdim edilmiş Realme 10 modelinə yaxından nəzər salaq.
Bu gün təqdim edilən Realme 10 modeli nə vəd edir?
Realme şirkəti tərəfindən bir neçə ay əvvəl rəsmi olaraq bu seriyanın ildə bir dəfə təqdim ediləcəyi açıqlanmışdı. Yəni Realme 10 modelindən sonra yaxın 1 il ərzində Realme 11 ortaya çıxmayacaq. Realme 10 modelinə geri gəldikdə isə sadə dizayna malik bir cihazla qarşılaşırıq. Smartfon kəskin dizaynlı gövdə dizaynını özündə birləşdirir. Arxa tərəfdə isə 2 ədəd bir-birindən ayrılmış kamera modulları quraşdırılıb. Ön tərəfdən cihaz gözə xoş görünsə də olduqca qalın ekran çərçivələrinə sahibdir. Bu da 2022-ci ilin sonunda çıxarılan bir smartfon üçün yaxşı hal deyil.
Yeni Realme 10 modeli öz gücünü MediaTek Helio G99 çipsetindən alır. Aşağıdakı şəkildən də gördüyünüz kimi ortalama bir orta seqment çipseti perfromansı göstərən Helio G99, AnTuTu testlərində 384.458 xal toplayır. Əlavə olaraq qeyd edək ki, smartfona UFS 2.2 və LPDDR4x yaddaş texnologiyaları quraşdırılıb. Eyni zamanda yaddaş həcmini əlavə olaraq 1TB-a qədər MicroSD ilə artıra bilərsiniz.
Şirkət bu smartfona 6.4 düymlük Super AMOLED ekran paneli quraşdırıb. FHD+ təsvir ölçülü ekranın görüntü yeniləmə tezliyi 90Hz təşkil edir. Uyğun olaraq Gorilla Glass 5 ilə qorunan ekran 1000 nit maksimum parlaqlığa çata bilər. Smartfonun performansı onsuzda çox yüksək olmadığından ekranın Super AMOLED olub, 90Hz görüntü yeniləmə tezliyi təklif etməsi kifayət olacaqdır.
Kamera parametrlərinə gəldikdə isə 1/2.76 düymlük 50MP ISOCELL JN1 əsas və 2MP dərinlik sensorlarına sahibdir. Selfi kamerası isə 16MP sensora malikdir.
Qeyd etmək lazımdır ki, Realme 9 ilə müqayisədə kameraları daha zəifdir. Ultra-geniş bucaqlı kamera ləğv edilib və 1/1.67 düymlük 108MP əsas kamera daha zəif alternativlə dəyişdirilib. Böyük bir ehtimalla bunun səbəbi smartfonun qiymətini daha da aşağı salmaq olub.
Təqdim edilmiş Realme 10 modeli 5000 mAs həcmli və 33 Vatt sürətli şarj dəstəkləyən batareyaya sahibdir. 3.5 mm qulaqlıq girişinə sahib olsa da “stereo” səs ucaldanlara sahib deyil. Lakin Realme şirkəti smartfondakı bir ədəd səs ucaldanın olduqca yüksək səsə malik olduğunu iddia edir. Smartfonun qiymətinə gəldikdə, 4-64GB yaddaşa malik variantı 230$ başlanğıc qiyməti ilə təklif edilir. Ən yüksək 8-256GB yaddaş variantını isə 300$ qarşılığında əldə etmək mümkündür.
Yekunda qeyd etməliyik ki, bu smartfonu almaqdansa ötən il çıxmış bu modelin sələfi olan Realme 9 modelini almaq daha məntiqlidir. Daha yaxşı kameraya sahib olub, yerdə qalan bütün xüsusiyyətləri demək olar eyni səviyyədədir. Ona görə də Realme modeli fikrimizcə o qədər də məntiqli olmayıb.
