Beləliklə, Apple yeni iPhone 16 seriyasının kütləvi istehsalı ilə bağlı artıq bütün hazırlıqları tamamlayıb. Belə ki, Gizmochina mənbəsinə görə, Foxconn artıq iPhone 16 seriyalı smartfonların kütləvi istehsalına başlayıb. Daha əvvəl isə Foxconn-un Çindəki müəssisələrində genişmiqyaslı işçi qəbuluna başladığı elan edilmişdi.
Smartfonların qlobal bazarda heç bir problem olmadan satışa çıxarıla bilməsi üçün Foxconn artıq iPhone 16 seriyasının kütləvi istehsalı ilə bağlı ilkin addımları atıb. Xatırladaq ki, yeni seriyalı smartfonların digər komponentləri artıq ötən aylardan istehsal olunmağa başlanılıb. Belə ki, ekran panelləri artıq iyun ayından kütləvi istehsala keçib və sentyabr ayında satışa çıxacaq smartfonlara kifayət edəcək qədər istehsal edilib. Bildiyimiz kimi, Samsung Display və LG Display iPhone 16 seriyası üçün OLED displeylər istehsal edir. Samsung və LG-nin 2024-cü ilin sonuna qədər Apple-a təxminən 80 milyon və 43 milyon panel tədarük edəcəyi gözlənilir.
Daha əvvəl ortaya çıxan iddialara görə, iPhone 16 seriyası daha da dar çərçivələrə sahib olacaq. Habelə, Pro modellərinin də iPhone 15 Pro və iPhone 15 Pro Max-dan daha böyük ekranlara sahib olacağı gözlənilir. Belə ki, İPhone 16 Pro və iPhone 16 Pro Max-ın müvafiq olaraq 6,3″ və 6,9″ panellərə sahib olduğu iddia edilir. Apple iPhone 16 seriyasının tədarükü ilə bağlı olduqca optimistdir. Hədəf iPhone 15 seriyası ilə müqayisədə 10 faizdən çox artıb və 90 milyon ədəddən çox satış əldə edilməsi gözlənilir.
