Yaxın günlərdə ilin ən böyük tədbirlərindən biri keçiriləcək. Belə ki, Apple brendi yeni modellərini o cümlədən iPhone 15 seriyasını bu tədbirdə elan edəcək. iPhone 15 seriyası ilə bağlı son dövrlərdə bir çox iddia ortaya atılır. Hətta ötən günlərdə yeni smartfon seriyasının Thunderbolt dəstəyi ilə gələcəyindən xəbər vermişdik. İndi isə Apple brendinin yeni flaqman seriyası olan iPhone 15 üçün şarj sürəti də məlum olub. Yeni ortaya çıxan məlumat bir çox analitikin iddiası ilə üst-üstə düşür.
Görünən odur ki, Apple brendi iPhone 15 seriyalı smartfonlarının şarj sürəti ilə Samsung ilə rəqabətə daxil olacaq. Ümumiyyətlə Apple smartfonları performansa cəhətdən lider mövqedə olsa da, batareya tərəfində mübahisə mövzusuna çevrilmişdi. İndi isə USB-C girişi ilə təchiz edilən yeni modellər bu mübahisəni aradan qaldıra biləcək. Beləliklə iPhone 15 modelləri 35 Vt-a qədər enerji toplaya biləcək. Bu göstərici ötən il təqdim edilən iPhone 14 modellərində sadəcə 27 Vt idi. Hətta iPhone 14 modeli 20 Vt, Pro modeli isə 27 Vt şarj sürətinə malik idi. İndi isə şarj sürəti əhəmiyyətli dərəcədə artacaq.
Maraqlısı budur ki, yeni flaqman seriya həm daha sürətli şarj olacaq, həm də daha sürətli məlumat ötürəcək. Bu isə Thunderbolt dəstəyi vasitəsi ilə mümkün olacaq. Apple yeni flaqman seriyasında müəyyən təkmilləşdirmə etsə də, hələ də əzəli rəqibinə çata bilmir. Çünki Samsung öz modellərində 45 Vt şarj sürəti təklif edir. Hətta Çinli smartfon istehsalçıları flaqman modellərini 70 Vt-dan çox şarj sürəti ilə təchiz edə bilir.
