Apple-ın gələn ay iPhone 15 seriyasını təqdim edəcəyi artıq dəqiqdir. Lakin yeniliklərin tam olaraq necə olması daim sual altındadır. İndi isə 2023 istehsalı iPhone modellərində sadə USB-C portu əvəzinə, əsasən kompüterlərdə gördüyümüz Thunderbolt standartlı bağlantı olacağı bildirilir. ChargerLAB resursunun məlumatına görə, yeni iPhone 15 seriyası Thunderbolt texnologiyasını dəstəkləyəcək. Nəticə etibarilə daha sürətli məlumat ötürülməsi mümkün olacaq.
Sızdırılan iPhone 15 komponentləri arasında Retimer çipinin varlığı görülür. Bu çip nədir deyə soruşsanız, Thunderbolt dəstəkli cihazlarda siqnalları bərpa etmək və siqnal titrəməsini azaltmaq üçün quraşdırılır. Beləliklə, bu çip iPhone 15 seriyası ilə USB-C portu üzərindən daha yüksək sürətlə məlumatları ötürməyə imkan verir.
Müqayisə üçün qeyd edək ki, Lightning konnektoru USB 2.0 üzərindən 480 Mbit/s-ə qədər sürət təklif edir. USB-C konnektoru 5Gbps ilə 10Gbps arasında məlumat ötürür. Thunderbolt-a gəldikdə məlumat ötürmə sürətləri 40Gbps-ə qədər yüksəlir. Bu o deməkdir ki, istifadəçilər adətən ProRes videoları kimi kompüterə ötürülməsi uzun vaxt aparan məlumatları daha sürətli ötürə bilərlər. Bu texnologiya şarj müddətinə də öz töhfəsini verir. Təbii ki, yalnız 25-30 vatt ilə limitlənmədiyini xəyal etsək mümkündür.
Thunderbolt dəstəyinin bütün iPhone 15 modellərində, yoxsa yalnız Pro modellərdə olacağı hələ dəqiqləşməyib. Çox güman ki, seriyaya aid sadə iPhone 15 modelləri Thunderbolt imkanına malik olmayacaq.
