Apple şirkətinin yaxın aylarda təqdim etməsi gözlənilən yeni iPhone 15 seriyalı smartfonların kamera xüsusiyyətləri ortaya çıxıb. Belə ki, Hong Kong mərkəzli Haitong International Securities investisiya şirkətinin analitiki Jeff Pu bu barədə paylaşım edib. Məşhur analitik sentyabr ayında təqdim edilməsi gözlənilən Apple iPhone 15 seriyalı smartfonların kamerası barədə məlumat verib. Jeff iddia edir ki, yeni iPhone 15 və iPhone 15 Plus modelləri sələfi ilə eyni kameraya sahib olacaq. Yəni adı çəkilən modellər ötən il iPhone 14 Pro modellərində istifadə olunan kamera sensoru ilə təchiz ediləcək.
Xatırladaq ki, Apple ötən il təqdim etdiyi və böyük marağa səbəb olan iPhone 14 Pro modellərində 48MP təsvir ölçülü kamera sensorundan istifadə etmişdi. Belə ki, texnologiya nəhəngi iPhone 14 seriyasının digər standart versiyalarında ənənəyə sadiq qalaraq 12MP təsvir ölçülü kameralardan istifadə etmişdi. İndi isə Apple ənənədən kənara çıxaraq iPhone 15 və iPhone 15 Plus smartfonlarının kamera xüsusiyyətləri barəsində dəyişiklik edəcək. Şirkət 48MP təsvir ölçülü kamera sensorlarını məhz sadə iPhone 15 və iPhone 15 Plus modellərində istifadə edəcək. Hətta məşhur analitik iddia edir ki, məhz bu qərara görə smartfonlar gözləniləndən daha gec satışa çıxarıla bilər. Əsas səbəb isə yeni ana kameraların tədarükü ilə bağlıdır.
Ümumiyyətlə Jeff Pu, iPhone 15 modellərində dizayn problemlərinə görə fiziki düymələrin istifadə olunmayacağını bildirən ilk şəxs idi. Hətta o bildirir ki, iPhone 15 Pro modelləri titan çərçivəyə, A17 Bionic çipsetlərə və 8GB RAM-a sahib olacaq. Onu da bildirək ki, iPhone 15 Pro ilə iPhone 15 Pro Max modellərinin kamera xüsusiyyətləri eyni olsa da bir fərqləri olacaq. Apple yeni Pro Max modelində periskop sistemindən istifadə edəcək. Bu isə Pro Max modelindəki kameranın daha üstün olacağından xəbər verir.
