Huawei şirkəti ötən gün Ümumdünya Virtual Reallıq Konfransında qeyri-adi Vision Glass ağıllı eynək modelini təqdim edib. Beləliklə ağıllı cihaz seqmentinə bir model daha əlavə olunub. Texnologiyanın inkişafı ilə birlikdə şirkətlər gün keçdikcə daha təkmilləşdirilmiş və daha çox funksiya yerinə yetirən ağıllı saat, ağıllı qolbaq modellərini təqdim edirlər. Lakin Huawei yeni ağıllı eynək modeli ilə bu şirkətlərlə rəqabət edə bilər.
Huawei Vision Glass modeli hansı xüsusiyyətlərə malikdir?
Yeni Huawei Vision Glass ağıllı eynəyi 120 düymlük virtual nəhəng ekrana bərabər olan inteqrasiya olunmuş microLED tipli displeyə malikdir. Həmçinin bu displey 1080p təsvir ölçüsünə və 480 nit parlaqlığa malikdir. Ağıllı eynəyin ən önəmıi xüsusiyyətlərin biri isə microLED displeyin DCI-P3 rəng gamutunun 90%-ə qədərini göstərməsi və həmçinin gözləri zərərli mavi işıqdan qorumasıdır.
Yeni ağıllı eynəyin mənfi cəhəti olaraq deyə bilərik ki, cihaz heç bir operativ yaddaş, çipset, daxili yaddaş, hətta batareya ilə təchiz olunmayıb. Məhz bu səbəbdən ağıllı eynəyi istifadə etmək üçün onu istifadə edəcəyiniz cihaza kabel ilə qoşmalısınız. Cihazın gələcəkdə daha çox təkmilləşdiriləcəyi güman olunsa da onun istifadə məqsədi hələ tam aydın deyil. Şirkət bu cihazı yəqin ki, VR və genişlənmiş reallıq dünyasına bir növ keçid üçün nəzərdə tutub. Lakin görünən odur ki, bi çox da uğurlu alınmayıb. Belə ki, yeni ağıllı eynəyinin sadə günəş eynəklərindən tək fərqi 120 düymlük virtual ekrana sahib olmasıdır. Əlavə olaraq qeyd edək ki, cihazın qiyməti hələlik açıqlanmayıb. Böyük bir ehtimalla sadəcə smartfona qoşulduğu üçün xeyli ucuz olacaq. Ön sifarişə bu gün açılması gözlənildiyindən, günün sonuna qədər qiyməti barədə dəqiq bir məlumatın gəlməsi gözlənilir.
