Müasir dövrdə həyatımızın bir parçasına çevrilən smartfonların batareya ömrü çox fərqlidir. Onlardan bəziləri 5000 mAs batareyaya sahib olaraq daha çox istifadə müddəti, bəziləri isə daha az istifadə müddəti təklif edir. Məşhur smartfon istehsalçısı olan OnePlus şirkəti üst seqment smartfon istifadəçiləri arasında smartfonların batareyası ilə bağlı The NPD Group tərəfindən tərtib olunmuş sorğunun nəticələrini açıqlayıb. Belə ki, sorğuda son 2 ayda minimum 600$ qiymətində smartfon alan 1000 istehlakçı iştirak edib. Onu da qeyd edək ki, sorğu ABŞ vətəndaşları arasında keçirilib.
OnePlus şirkətinin keçirdiyi sorğunun nəticəsi
Aparılmış sorğu nəticəsində, istifadəçilərin 69%-i öz smartfonlarını gün ərzində minimum iki dəfə şarj edirlər. İstifadəçilərin 43%-i isə şarj sürətindən narazıdırlar. Müasir dövrdə smartfonların yüksək həcmli batareyalar ilə təchiz olunmasına baxmayaraq, onlar güclü çipsetlər ilə təchiz edildiyinə görə güc sərfiyyatı çoxalır. Məhz bu səbəbdən də smartfon istifadəçiləri smartfonlarının istifadə müddətinin az olmasından narazıdırlar. OnePlus şirkətinin açıqladığı sorğuda iştirak edən insanların 64%-i telefonlarını gecə doldurmağa üstünlük verir, lakin 33%-i smartfonlarını gecə boyu doldurmağın və ya tez-tez doldurmağın batareyanı zədələyəcəyindən qorxur. Əslində isə qorxuya heç bir səbəb yoxdur. Çünki, müasir smartfonlar lazımi miqdarda şarj olduqdan sonra şarjı avtomatik olaraq dayandırır və lazımsız enerji sərfiyyatının qarşısını alır. Əlavə olaraq qeyd edək ki, sorğuda ABŞ vətəndaşlarının əksəriyyətinin evdə deyil, ictimai nəqliyatda smartfonlarını şarj etdiyi bildirilir.
Həmçinin sorğuda smartfon istifadəçilərinin 88%-nin simli şarjdan istifadə etdiyi məlum olub. Onlardan 46%-i smartfonunu avtomobildə şarj edir, 19%-i isə powerbanklardan istifadə edir. İstifadəçilərin 75%-i smartfonların qutularında şarj cihazı və şarj kabelinin vacib olduğunu vurğulayıb. Araşdırmalara görə son 1 il ərzində ABŞ-da 193 milyon şarj cihazı alınıb. Xatırladaq ki, bir çox smartfon istehsalçıları smartfonlarını heçbir şarj cihazı olmadan təklif edir. Hətta bu səbəbdən Apple şirkəti 19 milyon dollar cərimə olunmuşdu.
