2023-cü il Çinli brendlərin qlobal bazara hücum etməsi cəhətdən çox böyük bir il olacaq. Honor, Oppo kimi nəhənglər hal-hazırda Çində olan çeşidli modellərini qlobal bazarda yaymağa maraqlıdırlar. Hətta yaxın vaxtlarda Azərbaycanda da əvvəlcədən təməllərini formalaşdırmağa çalışan Motorola, İnfinix, Tecno kimi brendlərlə qarşılaşa bilərsiniz. Bütün bunlar 2023-cü ilin bizlər üçün çox maraqlı keçəcəyini göstərir. Ötən ilin sentyabr ayı təqdimatını sizinlə bölüşdüyümüz premium görünüşlü orta sinif smartfon olan Honor X40 modelini bəlkə də bəziləriniz xatırlayırsınız. Qıvrımlı və minimum qalınlıqda çərçivələrə malik ekranı, həmçinin çox erqonomik görünən gövdəsi olduqca diqqət çəkirdi. Ən vacib üstünlüyü isə qiymətinin sadəcə 220$ təşkil etməsi idi. Belə ki, Honor X40 modeli yeni Honor Magic 5 Lite adı ilə qlobal bazara gəlir.
Winfuture resursu qlobal bazar üçün Honor Magic 5 Lite modelinin render görüntülərin paylaşıb!
Almaniyanın Winfuture resursu Honor X40 modelinin təkrar brendləşdirilərək Honor Magic 5 Lite olaraq qlobal bazara çıxarılacağını təsdiqləyib. Eyni zamanda smartfonun render görüntüləri də izləyicilərlə bölüşülüb. Cihaz bizə texniki xüsusiyyətlər və canlı görüntülər baxımından çox tanışdır. Elə saytımızdan “Honor X40 modeli təqdim edilib!” məqaləsinə keçid etməklə cihaz barədə ətraflı məlumat əldə edə bilərsiniz.
Qlobal bazara da gəldikdə cihazın texniki xüsusiyyətlərində heç bir dəyişiklik olmayacaq. 6.67 düymlük 94% ekranın gövdə nisbtəinə sahib FHD+ təsvir ölçülü AMOLED ekran paneli görəcəyik. Smartfon öz gücünü Snapdragon 695 çipsetindən alacaq.
Cihaz Honor Magic 5 seriyasının bir parçası olaraq qarşıdan gələn WMC sərgisində təqdim ediləcək. Cihazın ən diqqət çəkən qiyməti isə qiyməti olmalıdır. İlkin ehtimallara görə rəsmi Avropa satış qiyməti 390 avro təşkil edəcək. Smartfonun sələfi ölkəmizdə Honor X9 seriyası kimi satışda mövcuddur ki, hal-hazırda 650 manata təklif edilir. Əgər bu model də ölkəmizə idxal edilirsə, ilkin ehtimallara görə 800 manata qədər yüksələn qiymətə sahib ola bilər. Sonda qeyd edək ki, cihaz ölkəmizə gəlsə böyük bir ehtimalla Honor Magic 5 Lite yox, üçüncü brendləşdirilmiş adı olan Honor X9a adını daşıyacaq.
