Honor şirkətinin ötən günlərdə Çində təqdim etiyi yeni Honor 90 seriyası artıq qlobal bazar üçün də təqdim ediləcək. Belə ki, şirkətin yeni seriyasının qlobal bazarda təqdim ediləcəyi tarix də məlum olub. Ümumiyyətlə Honor 90 seriyası daxilində bizləri 2 fərqli cihaz qarşılamışdı. Ötən ayın sonlarında təqdim edilən yeni seriya sadəcə Honor 90 və Honor 90 Pro modelindən ibarət idi. İndi isə yeni seriyanın 6 iyul tarixində qlobal bazar üçün təqdim ediləcəyi məlum olub.
Ümumiyyətlə yeni Honor 90 seriyası dizayn cəhətdən texnologiya həvəskarlarını təəccübləndirməmişdi. Çünki, Honor 50 seriyasından bu yana brend öz üslubuna sadiqliyini qoruyur. Lakin xırda dəyişikliklərlə birlikdə yeniləmələr özünü texniki cəhətdən göstərir. Honor 90 seriyası qlobal bazar üçün 6 iyul tarixində Fransanın Paris şəhərində təqdim ediləcək. Lakin artıq bizə Honor 90 modelinin Snapdragon 7 Gen 1 çipseti ilə təchiz olunduğu məlumdur. Həmçinin 6.7 düymlük 1.5K AMOLED ekran ilə təchiz edilmiş Honor 90 modeli 120Hz görüntü yeniləmə və tam olaraq 3840Hz PWM qarartma texnologiyasına malikdir. Kamera konfiqurasiyasında dəyişiklik bu cihazda telefoto obyektivinin olmaması cəhətdən özünü göstərmişdi. Onun yerində 2MP dərinlik sensoru quraşdırılan cihazın ön tərəfində yalnız 50MP təsvir ölçülü 100˚ selfi kamerası mövcuddur.
Honor 90 Pro modeli isə öz gücünü Snapdragon 8+ Gen 1 çipsetindən almışdı və 6.78 düymlük AMOLED 2700×1224 təsvir ölçülü ekran ilə təchiz edilmişdi. Kamera tərəfində isə smartfon 1/1.4 düymlük 200MP ISOCELL HP3 əsas, OIS ilə gücləndirilmiş 32MP 2.5 qat optik yaxınlaşdırma edə bilən telefoto (portret), 12MP ultra-geniş bucaqlı arxa kameraları ilə təchiz edilmişdi. Qiymət tərəfində isə Honor 90 355 dollar, Pro modeli 465 dollar başlanğıc qiyməti ilə çin bazarında təqdim edilmişdi. Hələlik isə yeni Honor 90 seriyası üçün qlobal qiymətlər və digər xüsusiyyətlər məlum deyil.
