Bildiyimiz kimi, Google bu il yeni Pixel 8 seriyasını təqdim etməyə hazırlaşır. Revengus ləqəbli insayder smartfonun təchiz ediləcəyi Google Tensor G3 prosessorunun bəzi xüsusiyyətlərini ortaya çıxarıb. Sözdə Snapdragon 8 Gen 3 ilə rəqabət edəcək Tensor G3 çipseti gözləniləndən daha az performans verə bilər. Belə ki, insayder iddia edir ki, yeni prosessor Snapdragon 8 Gen 3-dən çox zəif olacaq. Qeyd edək ki, yeni Tensor G3 prosessorunun gələn ay SOC I/O 2023 təqdimatında təqdim ediləcəyi gözlənilir.
Onu da qeyd edək ki, Google Tensor G3 çipseti AMD ilə əməkdaşlıq əsasında hazırlanmış Samsung Exynos 2300 prosessoruna əsaslana bilər. Lakin yeni məlumatlar Google şirkətinin AMD əvəzinə ARM əsaslı Mali GPU nüvələrindən istifadə etməyə davam edəcəyini göstərir. Revengus ləqəbli insayder bildirib ki, Tensor G3, 1 ədəd 3.30 GHz Cortex-X3 nüvəsindən, 4 ədəd 2.60 GHz Cortex-A715 nüvəsindən və 4 ədəd 2.60 GHz Cortex-A510 nüvəsindən ibarət 9 nüvəli konfiqurasiya ilə təklif olunacaq. Həmçinin o bildirib ki, yeni Tensor G3 prosessoru Exynos 2400-də istifadə olunması gözlənilən 4LPP+ texnologiyası yerinə Samsung şirkətinin daha köhnə 4LPP texnologiyasından istifadə edəcək. Buna əsas səbəb isə xərclərin azaldılması göstərilir. Lakin hələlik dəqiq səbəb məlum deyil.
Məhz bu səbəbdən də yeni Google Tensor G3 ən yaxşı halda Snapdragon 8+ Gen 1 ilə rəqib ola bilər. Belə ki, bu prosessor da Samsung 4LPP texnologiyasından istifadə edir. Ümumiyyətlə yeni ortaya çıxan xüsusiyyətlər doğrudursa onda, Tensor G3 Snapdragon 8 Gen 3 ilə deyil məhz Snapdragon 8 Gen 2 ilə də çətin rəqabət aparacaq. Daha dəqiq məlumatı gələn ay baş tutacaq təqdimatda biləcəyik.
