Garmin günəş enerjisi sayəsində “sonsuz” batareya ömrü təqdim edən yeni Instinct 3 adlı ağıllı saatını elan edib. Qeyd edək ki, Instinct 3 seriyası həm AMOLED, həm də MIP ekran seçimlərini təklif edir.
Yeni modelin ən diqqət çəkən xüsusiyyətlərindən biri MIP displey versiyasında olan günəş panelidir. Beləliklə, ağıllı saat günəş işığına məruz qaldıqda şarj edilir. Garminə görə, bu texnologiya batareyanın ömrünü demək olar ki, “sonsuz” edir. Garmin Instinct 3 iki fərqli versiyada mövcuddur: AMOLED displey (45 mm və 50 mm) və MIP displey (45 mm və 50 mm). MIP (Memory in Pixel) ekranlı model günəş paneli sayəsində aşağı enerji sərfiyyatı ilə seçilir. Bundan əlavə, saatların digər xüsusiyyətləri eynidir.
Yeni ağıllı saatlar idman fəaliyyətlərini izləyə, məşq zamanı baş verə biləcək yıxılma kimi “qeyri-adi vəziyyətləri” aşkarlaya və bir çox başqa funksiyaları yerinə yetirə bilər. Habelə, standartlaşdırılmış ürək dərəcəsi, yuxu və stress səviyyəsi və s. kimi bir çox sağlamlıq məlumatlarını izləyə bilən avadanlıqlara da sahibdirlər. Bütün bunlara əlavə olaraq, Garmin Pay vasitəsilə təmassız ödəniş, GNSS (Qlobal Naviqasiya Peyk Sistemi) ilə yer təyini və daxili fənər kimi xüsusiyyətlər də təklif olunur. Şirkətdən verilən məlumata görə, AMOLED ekran versiyası ağıllı saat rejimində 24 gün, peyk naviqasiyası rejimində isə 30-40 saat işləyə bilər. MIP ekranlı model günəş paneli sayəsində “sonsuz” istifadə müddəti təqdim edir. Ancaq bunun baş verməsi üçün saat gündə ən azı 3 saat açıq havada 50.000 lüks işıq altında istifadə edilməlidir.
Yeni ağıllı saatlar yanvarın 10-da satışa çıxarılacaq. Günəş enerjisi ilə işləyən versiya Garmin Instinct 3 Solar daha cəlbedici qiymət etiketinə malikdir. 45 mm-lik model 399 dollara, 50 mm-lik versiya isə 449 dollara satılacaq. AMOLED displey variantının qiymət etiketləri 45 mm üçün 449 dollar və 50 mm üçün 499 dollardır.
