Samsung şirkətinin hazırlıq mərhələsində olan yeni premium flaqmanı ilə bağlı bəzi detallar ortaya çıxıb. Müxtəlif qaynaqlar son 2 gün ərzində bu modellə bağlı yeni məlumatlar verməyə davam edir. Həmin məlumatlara əsasən, Galaxy S23 Ultra modelinin vacib yüksəltmələr alacağını qeyd edə bilsək də görünüşcə Galaxy S22 Ultra modelindən çox da fərqlilik gözləməyin. Çünki, smartfonun gövdəsi Galaxy S22 Ultra ilə müqayisədə təqribi 0.1 mm uzun və 0.2 mm enli olacaq. Qalınlığı isə 8.9 mm ilə dəyişməyəcək. Lakin Galaxy S23 Ultra modelinin sabit qalan gövdəsi güclü çipset, təkmilləşdirilmiş kamera, nəhəng barmaq izi sensoru kimi bir çox möhtəşəm yenilik alacaq.
Galaxy S23 Ultra modeli indiyə qədər çıxarılmış ən ideal Samsung modeli hesab ediləcək
İlk olaraq başlayaq elə Galaxy S23 Ultra modelinin alacaq olduğu nəhəng barmaq izi sensorundan. Alvin ləqəbli insayderin verdiyi məlumata görə Samsung şirkəti Galaxy S23 Ultra modeli üçün Qualcomm ilə yaxından əməkdaşlıq edəcək. Smartfonlar yalnız Snapdragon 8 Gen 2 çipseti ilə təchiz edilməklə qalmayıb, Qualcomm 3D Sonic Max barmaq izi oxuyucusunu da əldə edəcəklər.
Galaxy S23 Ultra modelinə quraşdırılacaq bu barmaq izi sensoru o qədər böyükdür ki, gücləndirilmiş təhlükəsizlik üçün iki barmaqla kilidin açılmasını belə təmin edə bilər. Lakin bu sensorun əsas məqsədlərindən biri erqonomikliyi artırmaqdır. Normal ekrandan barmaq izi oxuyan sensorlardan 17 dəfə böyük olan bu sensor eyni zamanda ultrasəs texnologiyası ilə də çox sürətli işləyir. Hal-hazırda Vivo X80 Pro və iQOO 9 Pro kimi modellərdə mövcuddur.
Smartfonla bağlı digər məlum olan detallar isə 6.8 düymlük 1440x3088p (piksel) təsvir ölçülü ekranın və 5000 mAs batareyanın sabit qalmasıdır. Galaxy S22 Ultra modelinin gövdəsi S-Pen və geniş batareya üçün çox yaxşı dizayn edilib. Ona görə Galaxy S23 Ultra modelinə bənzər detallar olduğu kimi ötürüləcək.
Yeni Galaxy S23 Ultra modeli yalnız Snapdragon 8 Gen 2 çipsetini alacaq. Bu detal əvvəlcədən bizə məlum olsa da İceUniverse ləqəbli insayder bu faktı bir daha təsdiqləyib. Digər bir əsas yenilik isə yenə sizə bildirdiyimiz kimi Galaxy S23 Ultra modelində işlədiləcək bu smartfon üçün hazırlanan ISOCELL HP2 200MP sensorudur. İddia edilir ki, Galaxy S23 Ultra modeli xüsusilə növbəti il çıxacaq iPhone 15 seriyası ilə rəqabətdə güclü olmaq üçün hazırlanır. Ona görə də şirkət bu modeldə heç bir səhv etmək istəmir.
Galaxy S23 Ultra modeli ilə bağlı hələ ki, paylaşacağımız məlumatlar bu qədərdir. Detallar artıq sızdırılmağa başladığı üçün yaxın həftələrdə smartfonun canlı prototiplərini belə görə bilərik. Gövdə həqiqətən eyni qalıbsa dizayn cəhətdən Galaxy S22 Ultra ilə yeganə fərq yalnız kamera modulunun görünüşündə yaranacaq.
