Artıq Samsung brendinin yeni flaqman smartfonlarını təqdim etməsinə sadəcə günlər qalıb. Daha əvvəl Samsung brendinin orta seqmentə daxil olan Galaxy A55 modelinin dizaynı internetə sızdırılmışdı. İndi isə Samsung Galaxy A55 modelinin 3 fərqli rəngdə rəsmi görüntüləri ortaya çıxıb və diqqət çəkib. Samsung indi yeni orta səviyyəli cihazını bir-birindən fərqli rəng seçimləri ilə təklif edəcək. Belə ki, Awesome Iceblue, Awesome Lilac və Awesome Navy rənglərində olan Galaxy A55 istifadəçilərin diqqətini cəlb edib.
Dizayn tərəfində isə smartfon sələfi Galaxy A54 ilə eyni detallara sahib olacaq. Samsung bu il də A seriyalı smartfonlarının dizaynını dəyişməyəcək. Sadəcə yeni Galaxy A55 modeli yan tərəfdə çıxıntı əldə edəcək. O cümlədən Galaxy 54 modelindən fərqli olaraq Galaxy A55 modeli daha fərqli çərçivəyə sahib olacaq. Qeyd edək ki, yeni ekran çərçivəsi dizaynı ötən ay təqdim edilən Galaxy A15 və A25 modellərində də istifadə olunub. Arxa kamera dizaynı ayrı-ayrı 3 linzadan ibarət olub və şaquli LED flaş ilə təchiz edilib.
Texniki tərəfdə isə cihazın Exynos 1480 çipseti ilə təchiz ediləcəyi artıq məlumdur. Qeyd edək ki, daha əvvəl sınaqdan keçirilən çipset təkli və çoxlu nüvə testində müvafiq olaraq 1180 və 3536 xal toplamağı bacarmışdı. Habelə Galaxy A54 çipsetində istifadə olunan Exynos 1380 eyni testdə müvafiq olaraq 1108 və 2797 xal toplamağı bacarmışdı. Android 14 əsaslı One UI 6.1 ilə təchiz ediləcək smartfonun ekran, kamera və batareya detalları hələlik məlum deyil. Gələn həftələrdə baş tutacaq Galaxy S24 təqdimat tədbirindən sonra Galaxy A55 ilə bağlı daha çox detalın ortaya çıxacağı gözlənilir.
